“Boukou dimounn ti deteste mwa”

MO PASE:

Mo ti grandi dan Santiago, kapital Chili, dan enn kartie kot ti abitie ena ladrog, bann group bandi, ek krim. Kan mo ti ena sink an, bann dimounn ti touy mo papa. Apre sa, mo mama ti viv avek enn misie ki ti bien move. Souvan li ti bat mo mama ek mwa. Ziska zordi mo ankor ena bann sikatris lor plan afektif.

Kan mo ti pe grandi, sa bann move linflians-la ti fer mwa vinn bien violan. Mo ti ekout bann lamizik heavy-metal, bwar plis ki bizin, ek parfwa mo ti mem pran ladrog. Souvan mo ti inplike dan bann lager avek bann trafikan ladrog lor sime, ek plizir fwa zot ti rod touy mwa. Ti ena enn fwa kot enn lot group ti angaz enn taper ki ti ena enn move repitasion, pou touy mwa. Mo ti gagn enn kout kouto, me mo ti reisi sove. Enn lot fwa, enn group trafikan ladrog ti pwint enn fizi kot mo latet ek ti rod pandi mwa.

An 1996, mo ti koumans kontan enn madam ki apel Carolina, ek lane 1998, nou ti marye. Apre nesans mo premie garson, mo ti per tansion akoz mo konportman violan, mo koumans azir parey kouma mo boper ek maltret mo fami. Alor, mo ti al rod led dan enn sant. Laba, mo ti gagn enn tretman medikal ek mo ti swiv enn terapi, me tousala ti dan vid. Mo ti kontign ankoler pou tou ti zafer; mo pa ti kapav kontrol momem. Parski mo ti anvi aret fer ditor mo fami, mo ti pran enn move desizion; mo ti rod swisid mwa. Gramersi mo pa’nn mor.

Mo ti enn ate pandan boukou lane, me ti ariv enn moman kot mo ti anvi krwar dan Bondie. Alor mo ti frekant enn relizion evanzelik pandan enn sertenn letan. Anmemtan, mo madam ti pe etidie Labib avek bann Temwin Jéhovah. Mo ti deteste bann Temwin, ek plizir fwa mo ti zour zot. Me touletan zot ti res kalm, ek se pa sa ki mo ti anvi.

Enn zour, Carolina ti demann mwa pou get Psaume 83:18 dan mo prop Labib. Sa verse-la dir dan enn fason bien kler ki nom Bondie se Jéhovah. Mo ti etone, kan mo ti realize ki dan mo relizion, ti aprann mwa ki ena enn bondie, me pa ti dir mwa ki so nom se Jéhovah. Koumansman lane 2000, mo’si mo ti koumans etidie Labib avek bann Temwin.

KOUMA LABIB INN SANZ MO LAVI:

Amezir ki mo ti pe progrese, sa ti rekonfort mwa kan mo ti aprann ki Jéhovah Li enn Bondie ki ena konpasion ek ki pardone. Par exanp dan Exode 34:6, 7, Labib dekrir Jéhovah kouma “enn Bondie ki ena mizerikord ek konpasion, ki pa ankoler vit ek ki ena lamour fidel ek laverite an-abondans, ki gard lamour fidel pou bann milye dimounn, ki pardonn erer, fot, ek pese.”

Kanmem sa, li ti bien difisil pou mo met an pratik seki mo ti pe aprann. Mo ti sir ki zame mo ti pou arive kontrol mo move karakter. Sak fwa ki mo pa ti reisi kontrol mwa, Carolina ti ankouraz mwa avek boukou lamour. Li ti rapel mwa ki Jéhovah trouv mo bann zefor. Kan li ti soutenir mwa, sa ti donn mwa lafors pou kontign fer zefor pou fer Jéhovah plezir, mem si parfwa mo ti santi ki mo ti enn ka dezespere.

Enn zour Alejandro, frer ki ti fer mo letid, ti demann mwa pou lir Galates 5:22, 23. Sa de verse-la dir ki frwi lespri Bondie se “lamour, lazwa, lape, pasians, zantiyes, bonte, lafwa, douser, metriz lor noumem.” Alejandro ti explik mwa ki se pa gras-a mo prop lafors ki mo pou kapav devlop sa bann kalite-la, me gras-a led lespri sin Bondie. Sa lexplikasion-la ti sanz net mo fason panse!

Plitar, mo ti asiste enn gran lasanble bann Temwin Jéhovah. Lord, propte, ek fraternite ki mo ti trouve laba, ti konvink mwa ki mo ti’nn trouv vre relizion. (Jean 13:34, 35) Mo ti batize an Fevriye 2001.

KI BENEDIKSION MO FINN GAGNE:

Jéhovah inn transform mwa. Alor ki mo ti enn dimounn violan, Jéhovah inn fer mwa vinn enn dimounn pasifik. Mo santi ki Li’nn tir mwa dan sa labou dan ki mo ti anfonse la. Boukou dimounn ti deteste mwa, ek mo pa donn zot tor. Me asterla, ansam avek mo madam ek mo de garson, mo pe servi Jéhovah dan lape.

Mo bann fami ek mo bann kamarad etone kan zot trouve ki kantite mo’nn sanze. Akoz sa, plizir parmi zot inn interese pou aprann konn laverite ki ena dan Labib. Mo finn osi gagn priviIez pou ed lezot dimounn konn Jéhovah. Sa ti vremem enn lazwa pou trouve kouma laverite ki ena dan Labib inn transform zot lavi osi!