REPONS POU BANN KESTION BIBLIK
Eski nou kapav konn laverite lor Bondie?
Kifer Bondie anvi ki nou konn laverite? Lir Zan 17:3
Bondie inn kominik avek bann dimounn. Li’nn servi so lespri sin, ouswa so lafors aktif pou met so panse dan lespri bann ekrivin Labib. (2 Pier 1:20, 21) Alor, nou kapav konn laverite lor Bondie kan nou lir Labib.—Lir Zan 17:17; 2 Timote 3:16.
Dan Labib, Bondie revel boukou kitsoz lor Li. Li fer nou kone kifer Li’nn kree bann dimounn, ki Li pou fer pou limanite, ek kouma Li anvi nou viv. (Zistwar Bann Apot 17:24-27) Zeova anvi ki nou konn laverite lor Li.—Lir 1 Timote 2:3, 4.
Kifer Bondie anvi ki bann dimounn kontan laverite?
Zeova Li Bondie laverite, ek Li’nn avoy so Garson, Zezi, pou ansegn bann dimounn laverite. Akoz samem, bann ki kontan laverite atire ar Zezi. (Zan 18:37) Bondie anvi ki sa bann dimounn-la vinn so bann adorater.—Lir Zan 4:23, 24.
Satan Lediab inn anpes boukou dimounn konn Bondie kan li’nn fann bann fos lansegnman lor Bondie. (2 Korintien 4:3, 4) Bann dimounn ki kontan lemal atire ar sa bann fos lansegnman-la. (Romin 1:25) Me plizir milyon dimounn ki sinser pe dekouver laverite lor Bondie kan zot etidie Labib.—Lir Zistwar Bann Apot 17:11.