Fer U Servis Avek Lazwa
1 Zezi ti dir ki pandan so prezans, enn gran mazorite dimunn pa pu ‘pran okenn kont,’ parey kuma dan lepok Noe. (Matye 24:37-39) Alor, nu kone ki buku pa pu ekut bon nuvel Rwayom. Me, ki kapav ed nu pu gard enn lespri zwaye dan nu minister?—Psom 100:2.
2 Premyerman, nu bizin gard byin dan nu lespri ki Bondye ki finn donn nu, nu mesaz ek nu responsabilite pu al prese. Malgre ki nu pe fer tu seki nu kapav dan nu minister, si bann dimunn pa ekute, an realite zot pe rezet Zeova Li mem. Si nu mazine ki Zeova byin apresye kan nu fidel dan predikasyon, sa pu fer nu gard nu lazwa ek nu pu ere pu fer travay Bondye.—Zak 1:25.
3 Dezyeman, ena ankor lezot dimunn ki pu aksepte mwayin ki Zeova pe servi pu sap nu. Malgre ki laplipar pa interese, ek mem ki lafin byin pre, ena ankor bann dimunn, kuma muton ki pu bizin rasanble. Nu bizin kontiyn prese, ek al “dan ninport ki lavil ek vilaz” pu “rod bann [dimunn] ki merite.”—Matye 10:11-13.
4 Gard enn Latitid Pozitif: Fos relizyon finn anbet buku dimunn par so move repitasyon. Akoz sa sistem egzistan la, lezot “pena nanyin ek zot fane partu-partu.” (Matye 9:36) Buku kapav dekuraze parski zot pena travay, sekirite ek zot pa kapav sweyn zot lasante. Si nu reysi konpran sa, sa pu ed nu pu persevere dan nu travay. Fer zefor pu ena konversasyon lor bann size ki konsern bann dimunn dan nu teritwar. Ed zot pu truve ki zis Rwayom Bondye ki solisyon tu bann problem. Servi Labib ek bann pwin presi dan bann piblikasyon pu fer bon nuvel tus zot leker.—Ebre 4:12.
5 Bann ki met an pratik parol Bondye avek lazwa rapel tuzur sa bann parol la: “Lazwa Zeova li [nu] fortres.” (Neemya 8:10) Fode pa ki nu perdi nu lazwa. “Si lakaz la merite, ki lape ki zot swete vinn lor li; me si li pa merite, ki zot lape return ar zot mem.” (Matye 10:13) Zeova renuvle nu lazwa ek nu lafors, ek Li beni nu kan nu fidel ek kan nu siporte avek pasyans dan so servis sakre.