Ed Lezot pu Asiste Bann Reynion
1 “Nu invit salerezman ninport ki kamarad dan vwazinaz . . . ki ule asiste bann reynion, pu vini.” Depi ki sa lanons la finn paret dan Phare de La Tour de Sion an Angle, edisyon Novam 1880, bann Temwin Zeova finn tuletan invit bann dimunn pu rasanble ansam pu les zot anseyne par Labib. (Revelasyon 22:17) Sa li enn parti inportan vre ladorasyon.
2 Li Inportan Asiste: Kan nu frekant kongregasyon, nu gayn bann benediksyon. Nu abitye plis ar nu Bondye Zeova. Nu zwenn dan kongregasyon pu les nu “anseyne par Zeova.” (Izai 54:13) So lorganizasyon finn prepar enn program lanseynman Labib permanan ki fer nu vinn pli pros ar Li ek ki donn nu led pratik pu aplik “tu bann konsey Bondye.” (Akt 20:27; Lik 12:42) Bann reynion donn nu enn lantrennman personel pu nu devlop nu kapasite pu anseyn Parol Bondye. Bann rapel ki dan Labib ed nu pu ena bann bon relasyon avek lezot ek avek Zeova Li mem. Nu lafwa vinn pli for kan nu frekant bann ki kontan Bondye.—Romin 1:11, 12.
3 Donn enn Linvitasyon Direk: Invit sak etidyan Labib pu asiste bann reynion, premye fwa ki u fer letid mem. Donn li enn linvitasyon. Partaz avek li enn pwin ki finn ankuraz u dan dernye reynion ki u finn asiste, ek donn li enn avangu seki pu ena dan prosin reynion, kumsa u pu pik so lintere. Explik li kuma Lasal Rwayom ete, ek asir u ki li kone kuma pu truv Lasal.
4 Si enn etidyan pa asiste bann reynion deswit, kontiyn invit li. Tulesemenn, pran detrwa minit pu montre li kuma nu lorganizasyon fonksyone. Servi brosir Les Témoins de Jéhovah— Unis pour faire la volonté de Dieu sur toute la terre ek kaset video Les Témoins de Jéhovah— Un nom, une organisation pu ki li abitye avek nu ek avek nu bann reynion. Fer lezot proklamater akonpayn u kan u al fer letid pu ki etidyan la abitye ar zot. Dan lapriyer, remersye Zeova pu so lorganizasyon ek mansyonn ki etidyan la bizin frekant lorganizasyon.
5 Pa ezite pu ed bann nuvo ki interese pu reyni avek nu. Plis zot apresye Zeova, plis zot pu santi zot puse pu met an pratik seki zot aprann ek pu fer parti dan lorganizasyon Bondye ki ini.—1 Korintyin 14:25.