8eme Partie: Amenn etudiant-la vers l’organisation
Bann l’etude biblik ki faire nou etudiant progressé
1. Kifer li important nou partage enn point lor l’organisation Jéhovah chaque semaine kan nou al faire l’etude?
1 Kan nou dirige enn l’etude la Bible, nou but c’est pa zis pou enseigne dimoune-la bann doctrine, mais aussi pou aide li pou faire partie dan la congregation chrétien. (Zek. 8:23) Brochure Les Témoins de Jéhovah : Qui sont-ils ? Quelles sont leurs croyances ? kapav aide nou pou faire sa. Quitte enn copie avek bann nouveau etudiant la Bible, ek encourage zot pou lire li. En plus, prend dé-trois minute chaque semaine kan ou al faire l’etude, pou partage enn point lor l’organisation Jéhovah avek zot.
2. Couma ou kapav encourage bann etudiant la Bible pou assisté bann reunion dan congregation?
2 Bann reunion congregation: Enn fason kot bann etudiant kapav developpe l’appreciation pou l’organisation Bondié c’est kan zot associé avek nou dan bann reunion congregation. (1 Cor. 14:24, 25) Sa vedir ki ou kapav commence par faire zot konn toulé-cinq reunion ki nou ena, ek explik zot chaque reunion, enn par enn. Faire zot konn titre prochain discours publik. Montré zot lartik ki nou pou etudié dan La Tour de Garde ek seki nou pou faire dan l’etude de livre. Explik zot couma Lekol ministere theocratik ek reunion service deroulé. Kan ou ena enn devoir dan lekol, kitfois ou kapav mem repete li devant zot. Partage bann point important ki finn dire dan bann reunion. Servi bann photo ki ena dan nou bann publication pou aide zot comprend couma bann reunion deroulé. Invite zot pou assisté bann reunion premier jour mem ou faire l’etude.
3. Ki bann kitsoz concernant l’organisation nou kapav discuté?
3 Kan ena Mémorial, l’assemblée, ek visite surveillant circonscription, prend dé-trois minute pou explik zot seki passé, ek faire zot envie assisté, zot aussi. Tigit par tigit, reponn bann question couma: Kifer nou appel Témoins de Jéhovah? Kifer nou appel place kot nou faire reunion, la Salle du Royaume? Ki responsabilité bann ancien ek bann assistant ministeriel ena? Couma organise travail predication ek territoire? Couma nou faire pou produire bann publication? Couma l’organisation financé? Ki bann kitsoz la filiale ek College central faire pou dirige nou bann l’activité?
4, 5. Couma nou kapav servi bann video pou augmente l’appreciation pou l’organisation?
4 Bann video ki enseigne nou: Enn lot fason kot bann etudiant la Bible kapav trouve l’organisation extraordinaire ki Jéhovah ena, c’est a travers nou bann video. Video Jusqu’aux extrémités de la terre montré nou travail predication dan le monde entier; Toute la communauté des frères montré l’amour ki ena entre bann frere dan le monde entier; ek Unis grâce à l’enseignement divin montré l’unité ki bann Témoins de Jéhovah koné. Enn madame ki prend nou bann magazine ek lezot publication depuis cinq an, ti bien touché ek li ti mem pleuré kan li ti guette video Les Témoins de Jéhovah : un nom, une organisation. Li ti faire confiance bann Témoins ki ti pé visite li, mais apré ki li finn guette sa video-la, li finn senti ki li kapav faire confiance l’organisation aussi. Li finn commence etudié la Bible, ek semaine ensuite, li ti assisté reunion dan la Salle du Royaume.
5 Si nou passe dé-trois minute avek nou etudiant ek nou servi bann zoutil ki nou gagné, nou kapav tigit par tigit amenn bann etudiant la Bible vers sel l’organisation ki Jéhovah pé servi zordi.