Kont lor Zeova pu Gayn Lafors
1 Nu bizin kont lor Zeova pu plizir rezon. Pres labonn nuvel “partu kot dimunn reste lor later,” sa li enn defi. (Mat. 24:14) Tuletan, nu pe bizin lager kont nu linperfeksyon. (Rom. 7:21-23) Anplis, “nu bizin lit . . . kont bann dirizan lemond [ki pli for ki bann dimunn] ki dan sa nwarte la.” (Efe. 6:11, 12) Vremem, nu bizin led. Kuma eski nu kapav gayn lafors ki Zeova done?
2 Par Lapriyer: Lamin Zeova zame tro kurt kan Li bizin donn so bann serviter so lespri sin ki byin for kan zot demann Li sa. (Lik 11:13) Eski u mank konfyans dan u kapasite pu pres lakaz-lakaz, pu donn temwaynaz lor lari, uswa par telefonn? Eski u timid pu donn temwaynaz okazyonel? Eski u finn perdi u zel parski bann dimunn dan teritwar pa pran nu mesaz kont? Ki u pu fer si met presyon lor u pu fer u abandonn u lafwa uswa u latasman fidel ar Bondye? Kont lor Zeova. Priye pu gayn lafors.—Fil. 4:13.
3 Par Letid Personel: Parey kuma nu gayn lafors kan nu manze lor plan fizik, nu fortifye nu lor plan spirityel kan nu nuri nu regilyerman avek Parol Bondye ek bann piblikasyon ki “esklav fidel ek avize” done. (Mat. 4:4; 24:45) Kan ti demann Frer Stanley Jones ki ti tusel dan kaso an Chine pandan plizir lane, ki finn donn li lafors pu siport sa san ki li ena enn Labib, li finn dir: “Nu kapav tini ferm dan lafwa. Byinsir, avan nu bizin etidye. Nu pena okenn lafors andan nu mem si nu pa etidye.”
4 Kan Asiste Bann Reynion: Dan enn reynion Kretyin premye syek, Zida ek Silas “ti ankuraz bann frer par buku diskur ek ti fortifye zot.” (Akt 15:32) Li parey zordi usi, seki nu tande dan bann reynion ogmant nu rekonesans pu Zeova, fer nu lafwa vinn solid, ek motiv nu pu nu minister. Dan bann reynion nu zwenn regilyerman ‘bann lezot kamarad ki travay pu rwayom Bondye,’ ek ki kuma enn ‘led ki rann nu for.’—Kol. 4:11.
5 Nu bizin led dan sa “bann letan kritik pu fer fas [ek] difisil pu siporte” la. (2 Tim. 3:1) Konsernan bann ki pran lafors ar Zeova, nu ena sa lasirans la: “Zot pu monte avek bann lezel kuma bann leg. Zot pu galupe ek zot pa pu fatige; zot pu marse ek zot pa pu feb.”—Izai 40:31.