Kifer Bizin Kontiyn Prese?
1 Eski depi lontan pe prese dan u landrwa? (Mat. 24:14) Si wi, u kapav panse ki teritwar kongregasyon finn ase kuver. Asterla kan u prese, kitfwa laplipar dimunn u zwenn paret pa pran kont mesaz Rwayom. Malgre sa, get seki liv Prophétie d’Isaïe II fer rekonet konsernan bann disip Zezi, dan paz 141: “Dan sertin landrwa, rezilta ki zot gayne dan zot minister kapav paret nanyin ditu an konparezon avek lapenn ek zefor ki zot done. Purtan, zot andire.” Me kifer bizin kontiyn prese?
2 Rapel Zeremi: Ki dimunn ekute uswa pa ekute, pa sa ki determine si nu pu andire fidelman dan travay predikasyon. Zeremi ti pres pandan 40 an dan mem teritwar mem si zis enn tigit dimunn ti ekut li ek buku ti kont so mesaz. Kifer eski Zeremi ti persevere? Parski li ti pe fer enn travay ki Bondye ti donn li lord pu fer ek seki ti pu arive dan lavenir ti obliz li kontiyn koze.—Zer. 1:17.
3 Nu sityasyon usi parey. Zezi finn “donn nu lord pu pres ar bann dimunn ek pu fer kone partu ki limem sa Kikenn ki finn etabli par Bondye la pu ziz bann vivan ek bann mor.” (Akt 10:42) Pu bann ki tann nu mesaz, sa li enn kestyon lavi uswa lamor. Bondye pu ziz bann dimunn dapre fason ki zot reazir ar labonn nuvel. Akoz sa, nu ena responsabilite pu fer egzakteman seki finn donn nu lord pu fer. Mem kan dimunn refiz ekute, sa donn nu lokazyon pu montre ki kantite nu kontan zot ek ki kantite nu devwe pu Zeova kan nu kontiyn fer seki nu bizin fer. Me sa pa aret la.
4 Nu Pe Tir Profi: Kan nu fer volonte Bondye, mem si dimunn dan teritwar pa pran kont nu mesaz, nu resanti lape andan nu mem, satisfaksyon ek boner, ki nu pa kapav gayne par enn lot fason. (Psom 40:8) Nu lavi ena enn vre sans. Plis nu partisip dan minister, plis nu leker ek nu lespri fixe lor lespwar ek lazwa pu viv dan nuvo lemond Bondye. Kan nu medit lor sa bann promes Labib la, sa ogmant nu spirityalite ek ranfors nu relasyon avek Zeova.
5 Mem si nu pa gayn rezilta deswit dan nu laktivite predikasyon, sirman enn lagrin laverite ki finn plante dan leker enn dimunn pu zerme dan ler ki Zeova finn fixe. (Zan 6:44; 1 Kor. 3:6) Personn parmi nu pa kone ki kantite dimunn ankor pu arive aprann konn Rwayom Bondye atraver bann zefor ki lepep Zeova pe fer, ki li dan nu peyi uswa dan lemond antye.
6 Plis ki zame avan, nu bizin ekut linstriksyon Zezi: “Fer atansyon, veye, parski zot pa kone kan ler fixe pu arive. Me seki mo dir zot, mo dir ar tu: Veye.” (Mark 13:33, 37) Donk nu tu, anu kontiyn anons labonn nuvel lor Rwayom, ek fer leker Zeova kontan amezir ki nu fer nu par pu sanktifye so gran non sakre.