Kifer nou contigne retourne kot bann dimoune
1. Ki question nou kapav posé en rapport avek nou l’activité predication?
1 Dan beaucoup l’endroit, nou travail nou territoire bien souvent. Nou contigne al faire mem lakaz, mem si dimoune-la finn dire nou ki li pa interessé. Kifer nou contigne al koz avek bann dimoune ki pa finn ecoute nou dan le passé?
2. Ki principal raison nou ena pou perseveré dan nou ministere?
2 L’amour pou Jéhovah ek pou bann dimoune: Principal raison kifer nou perseveré dan nou ministere c’est a cause nou l’amour pou Jéhovah. Nou leker pousse nou pou contigne koz lor nou grand Bondié avek lezot. (Luc 6:45) Nou l’amour pou Jéhovah pousse nou pou obeir so bann commandement ek pou aide lezot pou faire pareil. (Prov. 27:11; 1 Jean 5:3) N’importe couma bann dimoune reagir, nou, nou pou contigne enduré avek fidelité dan sa l’activité-la. Mem kan bann chrétien dan premier siecle ti gagne persecution, zot ti contigne preché “sans arreté.” (Actes 5:42) Kan bann dimoune pa’lé ecouté, au lieu ki nou laisse sa decourage nou, nou reste determiné. Coumsa nou montré ki quantité nou content ek nou attaché vrai-mem avek Jéhovah.
3. Couma l’amour pou bann dimoune pou aide nou pou contigne preché?
3 Nou perseveré aussi a cause l’amour pou nou prochain. (Luc 10:27) Jéhovah pa’lé ki personne detruire. (2 Pierre 3:9) Mem dan bann territoire ki nou travail souvent, nou encore pé joinde bann dimoune ki envie servi Jéhovah. Par exemple, dan Guadeloupe ena enn Témoin de Jéhovah pou chaque 56 dimoune, ek l’année derniere ti ena 214 baptisé. Ti ena preské 20,000 dimoune ki ti assisté Mémorial, apepré 1 dimoune lor 22 dan Guadeloupe!
4. Couma territoire kapav changé?
4 Bann changement dan territoire: Ena touletan bann nouveau dimoune dan nou territoire. Prochaine fois ki nou al kot enn dimoune ki pa ti ecouté, li possible ki enn lot membre so famille, kitfois-mem enn kikenn ki jamais pa finn tann nou message avant, ki pou ouvert la porte ek pou ecouté. Ou-soit nou kapav joinde bann nouveau dimoune ki zot, zot interessé. Bann zenfant ki zot parent opposé, grandi ek quitte lakaz. Kitfois sa bann jeune-la kapav envie ecoute message lor Royaume Bondié.
5. Ki kitsoz kapav faire bann dimoune envie ecouté?
5 Bann dimoune aussi changé. L’apotre Paul avant ti ‘enn dimoune ki ti koz en mal lor Jésus ek ti enn persecuteur, ek nanyin pa ti faire li peur.’ (1 Tim. 1:13) Pareil, beaucoup ki pé servi Jéhovah zordi, au commencement, zot pa ti interessé ar la verité. Ena mem kitfois ti opposé ar la bonne nouvelle pendant enn lepok. Mais avek bann condition ki pé changé dan le monde, certain ki ti opposé ou-soit ki pa ti interessé, kapav envie ecouté. Ena lezot ki kapav envie ecouté apré ki zot inn gagne enn problem grave, couma par exemple, enn mortalité dan famille, problem l’argent, enn problem la santé, ou-soit zot inn perdi zot travail.
6. Kifer nou bizin contigne preche avek zèle?
6 Sa system-la pé al fini, mais nou travail pou preché ek pou enseigne bann dimoune pé acceleré. (Is. 60:22) Alors, anou contigne preche avek zèle ek faire zeffort pou garde enn l’attitude positif. Prochain dimoune avek ki nou pou kozé, kitfois pou ecoute nou. Nou bizin contigne kozé! ‘Kan nou faire sa, nou pou sauve nou-mem ek bann ki ecoute nou.’—1 Tim. 4:16.