Couma zot pou tendé?
1. Kifer predication kapav difficile, ek kifer nou bizin perseveré?
1 Parski jour Jéhovah pé vini bien vite, ena enn besoin urgent pou aide beaucoup dimoune pou gagne enn connaissance exact lor Bondié ek lor so projet pou bann dimoune. (Jean 17:3; 2 Pierre 3:9, 10) Parfois sa kapav difficile, parski beaucoup dimoune pa interessé ou-soit bouffonne nou a cause nou predication. (2 Pierre 3:3, 4) Malgré sa, nou ena tou bann raison pou croire ki ena encore dimoune dan nou territoire ki pou accepté la bonne nouvelle kan zot tann li. Couma sa bann dimoune-la pou tendé si personne pa preché?—Rom. 10:14, 15.
2. Couma l’exemple l’apotre Paul encourage nou?
2 Faire face ar l’opposition: Parski ena toujours beaucoup dimoune ki envie ecoute message lor Royaume Bondié, fodé pa nou decouragé. La ville Philippes ti premier la ville en Europe kot l’apotre Paul ti preche la bonne nouvelle. Kan bann dimoune ti mette bann fausse accusation lor Paul ek Silas, toulé-deux ti gagne batté coute baton ek ti jette zot dan prison. (Actes 16:16-24) Selman sa l’epreuve ki zot ti koné-la pa finn faire Paul gagne peur ek arrete preché. Apré, dan Thessalonique, deuxieme la ville ki li ti visité dan so voyage missionnaire, li ti “prend beaucoup courage grace a Bondié.” (1 Thess. 2:2) Eski l’exemple Paul pa montré nou raison kifer “fodé pa nou renoncé”?—Gal. 6:9.
3. Ki kitsoz kapav finn change leker certain dimoune ki pa ti interessé avant?
3 Beaucoup dimoune ki finn refuse ecouté pendant bien longtemps finn change zot l’attitude envers nou message. Enn probleme economik, maladie, enn mortalité dan la famille, ou-soit bann evenement dan le monde ki troublé zot, tousala kapav faire dimoune-la changé. (1 Cor. 7:31) Certain jeune, ki zot bann parent ti opposé ar la verité, finn vinn bann adulte zordi, ek zot disposé pou ecouté. Kan nou pa arrete preché, nou donne zot possiblilité pou “invok nom Jéhovah” avant ki li trop tard.—Rom. 10:13.
4. Ki kitsoz ki motive nou pou contigné dan ministere “sans arreté”?
4 “Sans arreté”: Nou l’amour pou Bondié ek pou nou prochain pou motive nou pou contigne preché ek faire bann disciple “sans arreté,” pareil couma bann zapotre ti faire dan premier siecle. (Actes 5:42) Zordi beaucoup dimoune pé “plaigné a cause bann kitsoz detestable” ki existé. (Ézék. 9:4) C’est vrai-mem enn l’espoir ek enn soulagement ki bann dimoune gagné kan zot tann la bonne nouvelle! Mem si la plupart dimoune pa’lé ecouté, la Bible donne nou l’assurance ki Jéhovah bien apprecié bann zeffort ki nou faire.—Héb. 13:15, 16.