Enn Labiyman ek Laparans Ki Sinp
1 “Tu bann zom, mem bann zenn garson, met kravat. Tu bann madam ek tifi, bann adolesan ek bann tipti usi, met enn rob uswa enn zip. Pa truv personn an jinn uswa avek enn semiz san kravat. Tu dimunn ki la dan lazwa.” Ala seki enn zurnal finn dir. Ki kalite laful li ti pe dekrir? Enn rasanbleman politik? Enn levennman sportif? Enn konser rok? Non byinsir! Li ti pe dekrir enn grup bann frer ek ser dan enn gran lasanble distrik lane dernyer.
2 Dan enn lot lavil kot ti ena lasanble, enn zurnalis finn dekrir laful bann Temwin kumsa: “Tu bann zom prop ek zot met kostim ek kravat. Bann madam abiy sinp, me byin.” Enn dezyem obzervater, enn gard sekirite, ti dir: “Zot bann dimunn ki ena enn bon kondwit, ki respektab ek prop. Seki mo truve li byin atiran. Dan sa lemond malprop la, zot finn reysi anlev seki sal!” Ala, bann byin zoli temwaynaz ki’nn fer an nu faver! Eski nu pa rekonesan ki lafami internasyonal nu bann frer gayn tu sa felisitasyon la? Byinsir, par zot bon laparans tu bann Temwin ki ti la ti fer zot par pu gayn sa bann bon rapor la.
3 Partu lor later bann dimunn remark nu byin parski nu byin diferan par nu laparans. (Mal. 3:18) Kifer? Parski nu swiv konsey Labib ki dir, “aranz [nu] avek enn labiyman byin ordone, avek modesti ek bon zizman, . . . kuma li bizin ete pu [bann] ki dir zot ador Bondye avek respe.”—1 Tim. 2:9, 10.
4 Ki U Montre par U Labiyman ek U Laparans? Linz ki nu mete ek fason nu met li donn enn temwaynaz kler lor nu—lor nu krwayans, nu latitid ek nu bann lintansyon. Bann stil ki nu swazire montre kisannla nu ete ek ki nu reprezante. Fode zame nu ankuraz panse ek kondwit degradan ki lemond fer vinn popiler. Seki bizin interes nu, se pa si enn sertenn stil li byin lamod, me plito si li bon pu enn kikenn ki dir li enn minis Bondye. (Rom. 12:2) Olye ki nu swazir enn laparans fizik ki montre enn lespri indepandan uswa enn fason viv imoral, nu anvi montre ki vremem nu “donn Bondye laglwar.”—1 Pyer 2:12.
5 Parfwa, enn nuvo ki pena lexperyans, uswa ki feb lor plan spirityel kapav aksepte ninport ki labiyman ek laparans lor ki lemond fer piblisite, san ki li pans premyerman ki linpresyon sa done lor Zeova ek lor so lorganizasyon. Nu tu kapav fer enn analiz pu gete si nu’nn les nu inflyanse par panse lemond. Nu kapav apros enn frer uswa enn ser ki byin respekte, ki ena matirite spirityel ek demann li get onetman nu stil labiyman ek nu laparans. Lerla, analiz numem dapre bann sigzesyon ki li pu donn nu.
6 Sertin dispoze pu vey lor zot labiyman dan lasanble. Me selman dan bann detant apre bann sesyon, zot bes zot nivo. Gard nivo elve ki apropriye pu bann minis Bondye. (2 Kor. 6:3, 4) Ninport kot nu ale an piblik, nu baj lasanble ansam avek nu labiyman ek nu laparans ki korek idantifye nu kuma bann Temwin Zeova. Donk, nu labiyman bizin tultan byin aranze ek sinp, seki montre ki nu “pa fer parti dan sa lemond la.”—Zan 15:19.
7 Pu Lasanble Distrik “Bann Proklamater Rwayom Ki Zele” sa lane la, anu fer tu seki nu kapav pu pruve ki nu “enn pep sin pu [nu] Bondye Zeova.” Bon linpresyon ki sa pu done pu ogmant “laglwar, repitasyon ek bote” Zeova.—Det. 26:19.
[Lankadre lor paz 6]
Kuma pu Donn Zeova Laglwar:
■ Abiy enn fason ki apropriye pu enn minis Bondye.
■ Evit bann stil ki swiv lespri lemond.
■ Res sinp pu montre ki u ena bon zizman.