Kan Nu Abiy Nu dan enn Fason Respektab, Sa Montre ki Nu Ena Respe pu Bondye
1. Kuma eski nu kapav montre nu lapresyasyon kan nu vinn asiste prosin lasanble distrik?
1 Byinto, dan Lasanble Distrik 2003 “Donn Bondye Laglwar,” nu pu gayn privilez pu vinn bann invite Zeova. Wi, nu byin rekonesan ki Zeova finn invit nu pu enn gran repa spirityel kumsa! Nu kapav montre nu respe pu Li ek nu lapresyasyon pu bann don spirityel ki Li donn nu. Kuma? Se par fason ki nu abiy nu ek par nu laparans.—Psom 116:12, 17.
2. Kifer eski li inportan ki nu prop ek ki nu ena enn bon laparans prop?
2 Prop ek an Ord: Nu Bondye Li enn Bondye prop ek an ord. Nu laparans bizin reflekte so bann prinsip. (1 Kor. 14:33; 2 Kor. 7:1) Numem, nu seve, nu zong bizin prop. Ek nu linz bizin an ord. Zordi, partu nu truv bann dimunn ki abiy zot dan enn fason debraye. Me, se pa parski enn akter uswa enn vedet spor abiy dan enn fason debraye ki nu bann Kretyin nu bizin fer parey. Si nu swiv bann lamod, bann dimunn kapav gayn difikilte pu fer diferans ant bann dimunn ki servi Bondye ek bann dimunn ki pa servi Li.—Mal. 3:18.
3. Kuma eski nu kapav asir nu ki nu laparans pu an armoni avek konsey ki truv dan 1 Timote 2:9, 10?
3 Abiye dan enn Fason Ki Montre ki Nu Bann Kretyin: Kan Lapot Pol ti ekrir Timote, ki ti enn ansyin, li ti ankuraz ‘bann fam pu abiy zot byin dan enn fason respektab ek sinp, . . . dan enn fason ki montre ki zot bann fam ki ador Bondye avek respe, setadir grasa bann bon aksyon.’ (1 Tim 2:9, 10) Pu nu sir ki nu pe abiy nu dan enn fason respektab, nu bizin pran letan pu reflesi lor la. Nu linz bizin an ord, prop ek sinp. Fode pa li ki nu labiyman li kas lizye uswa provokan.—1 Pyer 3:3.
4, 5. Ki bann kitsoz ki bann frer ek bann ser bizin fer atansyon?
4 Pol ti usi averti kont danze ki ena kan nu abiy nu dan enn fason tro egzazere avek “bann tres seve, lor, perl uswa bann linz ki kut ser.” (1 Tim. 2:9) Li pu bon si bann ser servi bann bizu, makiyaz ek bann lezot kitsoz ankor dan enn fason ekilibre.—Prov. 11:2.
5 Konsey ki Pol ti donn bann ser li aplik usi pu bann frer. Bann frer bizin evit bann lamod ki reflekte fason panse sa lemond la. (1 Zan 2:16) Par egzanp, dan sertin peyi, li normal ki bann dimunn met bann linz ki larz-larz, bann bagi. Me sa lamod la li pa apropriye pu enn serviter Bondye.
6. Kifer eski sak zur nu bizin gard enn nivo elve an seki konsern labiyman ek laparans kan nu pe vwayaze pu al lasanble uswa kan nu pe returne, ek pandan lasanble?
6 Dan Bann Detant: Pandan lasanble, laplipar bann frer ek ser donn enn bon legzanp an seki konsern labiyman ek laparans. Avredir, nu laparans, ki li pandan lasanble uswa dan ninport ki moman, li kapav inflyans fason ki bann dimunn konsider lepep Bondye. Pwiski nu port nu baj, nu bizin tuletan abiy nu dan enn fason ki montre ki nu bann Kretyin. Suvan, sa pus bann dimunn pu felisit nu ek kumsa nu kapav donn enn temwaynaz.—1 Kor. 10:31-33.
7. Ki lefe nu labiyman byin respektab ek nu laparans kapav ena lor lezot?
7 Enn zoli surir kapav fer nu paret pli atiran. Pareyman, kan nu abiy nu dan enn fason respektab ek nu ena enn bon laparans, sa donn mesaz ki nu pe anonse ek lorganizasyon ki nu reprezante buku valer. Sertin ki pu obzerv nu pandan Lasanble Distrik “Donn Bondye Laglwar” sa lane la, kapav santi zot puse pu rod kone kifer nu diferan avek lezot. Ek kitfwa mem zot kapav dir: “Nu pu al avek zot, parski nu finn tande [ek nu’nn obzerve] ki Bondye Li avek zot.” (Zek. 8:23) Ki nu tu nu montre ki nu ena respe pu Zeova par nu fason abiye ek nu laparans.
[Lankadre lor paz 5]
Ena enn Bon Laparans
▪ Kan nu pe vwayaze
▪ Pandan lasanble
▪ Dan bann detant