Enn Laparans Ki Pure ek Ki Lezot Koz an Byin
1. Amezir nu pe prepar nu pu lasanble distrik, kifer nu bizin reflesi lor nu laparans?
1 “Pena pli bon dimunn ki bann Temwin Jéhovah! Zot zanti ek zot abiy byin, ek zot ena enn profon respe pu lezot.” Se seki reprezantan enn lotel ti dir lor bann frer ek ser ki ti asiste enn lasanble distrik lane dernyer. Pandan enn lot lasanble, enn anplwaye lotel ti fer sa komanter-la: “Li kler ki zot, bann Temwin Jéhovah, zot abiye pu fer Bondye plezir.” Wi, dimunn remark byin bann frer ek ser ki asiste lasanble. Akoz sa, nu anvi abiy nu dan enn fason ki “diyn de la bonn nuvel” ki nu prese. Ek suvan, sa pus bann obzervater pu felisit nu, ek sa montre klerman ki nu bann serviter Bondye. (Phil. 1:27) Amezir nu pe prepar nu pu lasanble distrik, li bon ki depi aster-la mem, nu reflesi lor nu laparans.
2. Kifer eski li pa fasil pu ena enn labiyman ek enn kwafir ki reflet la pureté?
2 Disip Jacques finn ekrir: “Sazes ki sorti lao, li avan tu pure.” (Jacq. 3:17) Li pa fasil pu gard enn laparans ki pure. Sa lemond imoral ki dirize par Satan-la, inflyans bann dimunn pu adopte bann stil ki sokan, provokan ek debraye, ki pa konvenab ditu. (1 Jean 2:15-17) Donk, kan nu pran bann desizyon konsernan nu labiyman ek nu kwafir, nu bizin pran byin kont sa konsey ki la Bib done-la: ‘Ena degu pu bann kitsoz ki Bondye pa kontan ek pu bann dezir sa lemond-la; viv avek bon zizman . . . dan sa lemond-la.’ (Tite 2:12) Ki li nu bann frer, uswa bann obzervater, zame nu pa pu anvi sok zot par nu laparans.—1 Cor. 10:32, 33.
3. Ki bann kestyon nu kapav poz numem an rapor avek nu labiyman?
3 Abiy Byin, Avek Modesti: Kan nu pe prepar nu pu lasanble, nu kapav demann numem: ‘Eski mo linz li sinp, uswa li atir latansyon lor mwa? Eski mo montre ki mo respekte santiman lezot? Eski mo bluz tro dekolte uswa tro kurt? Eski mo rob transparan, uswa eski li tro kole? Eski mo linz prop? Eski li santi enn move loder? Apre lasanble, dan mo moman detant alor ki mo baj ankor lor mwa, eski mo laparans pu prop, an ord, diyn pu enn Kretyin, uswa mo linz pu debray-debraye, enn stil eksantrik, tro rilax, ek pa apropriye pu enn delege lasanble? Eski fason ki mo pu abiye pandan bann detant, pu met mwa malalez pu donn enn temwaynaz informel?’—Rom. 15:2, 3; 1 Tim. 2:9.
4. Kuma eski lezot kapav ed nu pu ena enn laparans ki pure?
4 Bann Kretyin ki ena matirite spirityel, kapav donn nu bann bon sigzesyon lor nu laparans. Bann madam kapav demann zot mari kuma lezot kapav truv zot labiyman. Bann paran Kretyin kapav ed zot bann zanfan adolesan dan sa domenn-la. Anplis, bann ser ki pli aze kapav “ramenn bann zenn fam a la rezon, . . . [ed zot] pu ena enn bon zizman,” ek res “pures” dan zot laparans “pu ki personn pa koz an mal lor parol Bondye.” (Tite 2:3-5) Pa fini, dan nu bann piblikasyon ena bann foto, ki ed nu pu kone kuma nu kapav abiy byin, avek modesti.
5. Kuma eski nu tu nu kapav glorifye Jéhovah pandan lasanble?
5 Glorifye Jéhovah: Bann lasanble distrik zot enn bon lokazyon pu nu tu, pa zis bann ki ena partisipasyon, pu glorifye Jéhovah. Byinsir, nu bon kondwit ek nu langaz pu glorifye Li. Me, premye kitsoz ki bann obzervater remarke lor nu, se nu labiyman ek nu kwafir. Donk, nu tu, anu glorifye Jéhovah par enn laparans ki pure, ki lezot koz an byin.—Ps. 148:12, 13.
[Lankadre lor paz 6]
Seki Pu Ed Nu Ena enn Laparans Ki Lezot Koz an Byin
◼ Parol Bondye
◼ Egzaminn numem
◼ Sigzesyon lezot
◼ Bann piblikasyon Kretyin