Nuvo Program Lasanble Sirkonskripsyon
1 Pu nu gard nu lafwa ferm dan enn lemond ki pa stab, nu bizin fer konfyans Zeova. Kuma eski nu kapav manifeste sa konfyans la dan nu lavi tulezur? Ki lefe nu konfyans an Zeova ena lor nu lavi fami ek nu lavi personel? Kuma eski sa ed nu pu reziste kont linflyans lemond Satan? Program lasanble sirkonskripsyon pu lane servis 2003 reponn sa bann kestyon la. So tem se “Fer Konfyans Zeova ek Fer Seki Bon.”—Psom 37:3.
2 Pa zis dan ban lokazyon spesyal uswa dan bann moman kot nu dezespere ki nu bizin montre nu konfyans an Zeova. Sa konfyans la ena enn lefe lor tu seki nu fer dan nu lavi tulezur. Premye diskur, “Fer Konfyans Zeova Tuletan” atir latansyon lor la. (Psom 62:8) Dan diskur an kat parti, “Kuma Montre Konfyans an Zeova,” nu pu aprann kuma pu truv ek aplik bann ranseynman ki baze lor Labib. Sa bann ranseynman la kapav ed nu pu konstrir enn maryaz ki reysi, pu regle bann problem ki kapav leve dan fami, ek pu gayn seki nu bizin dan lavi.
3 Lemond Satan sey fer nu aksepte enn lopinyon deforme lor seki bon ek seki pabon. Li usi met nu dan konfizyon konsernan ki kitsoz ki inportan ek ki kitsoz pa inportan. (Izai 5:20) Bann diskur “Fer Atansyon Bann Kitsoz Ki Pa Vo Nanyin dan Lavi” ek “Evit Seki Move—Vinn Bann Ki Pratik Seki Bon” pu fer nu plis deside ankor pu obeir bann prinsip elve Zeova.—Amos 5:14.
4 Kan Zeova pu fer sa move sistem kot nu pu viv la disparet, bann serviter Bondye pu bizin ena enn konfyans total an Li. Diskur piblik, “Delivrans Ar Detres Lemond Li Pros” pu montre byin sa pwin la. Apre sa, pu invit nu pu egzaminn numem dan diskur “Eski Pu Ziz U Diyn Pu Gayn Rwayom Bondye?” Program la pu fini avek enn lankurazman pu “Fer Konfyans Bann Promes Zeova.”
5 Enn moman inportan dan sak lasanble se diskur batem. Tu seki anvi batize bizin dir sirveyan prezidan pli vit posib pu ki fer bann laranzman neseser.
6 Dan sa lepok kot nanyin pa sir la, se dan Zeova tusel ki nu kapav ena enn konfyans sir. (Psom 118:8, 9) Anu afermi nu konfyans an Li kan nu prezan pandan program lasanble sirkonskripsyon an antye.