Jéhovah Aide Bann Ki Éna Confiance en Li
1 Beaucoup dimoune pensé ki c’est l’argent, pouvoir ek zot propre capacités ki pou faire zot réussi dans la vie. (Ps. 12:4; 33:16, 17; 49:6) Mais, bann ki éna la crainte pou Jéhovah ek ki mette zot confiance en Li, éna l’assurance ki “Li zot secours ek zot bouclier.” (Ps. 115:11) Anou guette deux domaines kot nou bizin montré nou confiance en Jéhovah.
2 En Tant Ki Ministres Chrétiens: Chaque fois ki nou éna enn sujet pou présenté dans la congrégation ou kan nou enseigné dans la prédication, nou bizin compte lor Bondié. Anou pran l’exemple Jésus. Mem si Jésus ti Garçon Bondié, li pa ti compte lor so propre sagesse ou-soit lor so propre capacité, mais li ti compte entièrement lor so Papa. (Jean 12:49; 14:10) Maziné aster, ki quantité nou, nou bizin compte lor Bondié! (Prov. 3:5-7) C’est seulement avec soutien Jéhovah ki nou bann zefforts limité, pou réussi honore Li, ek bénéficié lézot.—Ps. 127:1, 2.
3 Nou montré ki nou compte lor Jéhovah kan nou prié pou gagne so direction ek l’aide so l’esprit saint. (Ps. 105:4; Luc 11:13) En plus, nou montré ki nou faire Bondié confiance kan nou base nou l’enseignement lor so Parole la Bible. Sa message ki éna ladan-la, éna pouvoir pou touche léker bann dimoune sincère ek transforme zot la-vie. (Héb. 4:12) Jéhovah gagne la gloire kan nou ‘servi couma enn dimoune ki depann lor la force ki Li donné.’—1 Pierre 4:11.
4 Kan Nou Faire Façe ar Bann Problèmes: Nou bizin aussi tourne vers Jéhovah kan nou pé faire façe ar bann pressions ek bann problèmes. (Ps. 46:1) Par exemple, kitfois nou patron kapav hésité pou donne nou enn congé pou assisté l’assemblée, ou-soit kitfois nou pé faire façe ar enn situation difficile dans la famille. Nou montré nou confiance en Jéhovah kan nou contigne prié Li sincèrement, ek applique direction ki Li donne nou à travers so Parole ek so l’organisation. (Ps. 62:8; 119:143, 173) Kan bann serviteurs Jéhovah faire sa, zot trouve couma Jéhovah aide zot dans zot la-vie.—Ps. 37:5; 118:13, 16.
5 Jéhovah Limem donne nou sa l’assurance-la: “Enn dimoune ki mette so confiance en Jéhovah, ek ki’nn faire Jéhovah vinn so l’assurance, pou gagne bénediction.” (Jér. 17:7) Oui, anou montré nou confiance en Li dans tou séki nou faire!—Ps. 146:5.