Led dan Ler Ki Bizin
1 Pol ti realize ki li ti bizin fortifye so bann konpaynon. Sa gran lintere ki li ti ena pu zot la ti pus li pu donn zot bann rapel ek bann lankurazman ranpli ar lamur. (2 Pyer 1:12, 13; 3:1) Li ti ankuraz ‘bann ki ti’nn gayn lafwa’ pu kontiyn devlop bann kalite spirityel. Kifer? Pu ki zot pa vinn “swa pares uswa enn kikenn ki pa raport frwi konsernan konesans egzak nu Senyer Zezi Kris.” (2 Pyer 1:1, 5-8) Pyer ti anvi ed zot pu asir zot ki lapel ek swa ki Bondye finn fer pu zot al viv dan lesyel, pu arive vremem. Kumsa ‘Bondye ti pu truv zot san tas ek san defo ek dan lape.’ (2 Pyer 1:10, 11; 3:14) Pu buku, sa lankurazman ki li ti done la, ti enn led dan ler ki bizin.
2 Zordi, bann ansyin usi interes zot ar bann serviter Bondye. Dan sa “bann letan kritik ek difisil pu siporte” la, buku serviter Zeova bizin lite ar bann sityasyon difisil. (2 Tim. 3:1) Buku konn bann problem finansye, problem fami uswa problem personel ki pale fini. Akoz sa, sertin resanti parey kuma David, ki ti dir: ‘Telman ena maler ki finn anserkle mwa, ki mo pa kapav kont zot. Mo bann fot finn vinn telman buku ki mo pa kapav kont zot. Zot pli buku ki bann seve lor mo latet, ek mo nepli ena kuraz.’ (Psom 40:12) Sa bann presyon la kapav vinn telman lur, ki sa bann frer ek ser la kapav negliz bann responsabilite spirityel ki byin inportan. Ek zot kapav mem aret prese. Me purtan, malgre zot bann difikilte, ‘zot pa finn bliye bann komannman Zeova.’ (Psom 119:176) Asterla, se enn bon moman pu bann ansyin donn zot led ki bizin.—Izai 32:1, 2.
3 Pu zot reysi fer sa, bann ansyin finn ankuraze pu fer enn zefor spesyal pu ed bann ki inaktif dan predikasyon. Ansemoman mem zot tu pe fer enn gran zefor dan sa domenn la, ek sa pu kontiyne ziska lafin Mars. Bann sirveyan Letid Liv finn gayn lankurazman pu vizit bann ki inaktif ek donn zot enn led spirityel. Zot fer sa avek lintansyon pu ed bannla pu rekumans sorti dan predikasyon. Si enn kikenn vremem bizin led, bann ansyin kapav fer bann laranzman pu fer enn letid Labib avek li. Kitfwa bann ansyin pu demann bann lezot proklamater pu ed zot. Si zot demann u sa, u kapav sir ki u bann zefor pu enn gran led pu zot. Sirtu si u ankuraz sa bann inaktif la avek duser ek u montre ki u konpran zot.
4 Wi, nu tu nu kontan kan enn kikenn revinn aktif dan kongregasyon. (Lik 15:6) Nu bann zefor pu ankuraz bann ki inaktif kapav vinn ‘enn parol ki arive dan ler ki bizin.’—Prov. 25:11.