Bann visite faire nou gagne bann l’etude la Bible
1. Kifer eski li bien important ki nou faire bann visite?
1 Jésus ti donne l’ordre so bann disciple, pa zis pou preché, mais aussi pou “faire bann disciple . . . [ek] enseigne zot.” (Mat. 28:19, 20) Enn proclamateur c’est enn kikenn ki annonce enn message alors ki enn enseignant faire plus ki sa. Enn enseignant, li enseigné, li expliké ek li donne bann preuve. Enn fason ki nou ena pou enseigne lezot c’est kan nou visite bann dimoune ki interessé, avek l’objectif pou commence bann l’etude la Bible avek zot.
2. Kisannla nou bizin visité?
2 Kisannla nou bizin visité? Assure-ou ki ou visite tou bann dimoune ki’nn accepté bann publication ou-soit ki’nn montré mem enn ti l’interet pou la bonne nouvelle. Si, letan ou pé preché dan enn l’endroit publik, ou joinde enn kikenn ki montré l’interet, essaye gagne so l’adresse ek so numero telephone. Garde enn l’attitude positif pou commence bann l’etude la Bible. Contigne rod bann ki pou accepté etudié la Bible, ek pena doute ou pou trouve sa bann dimoune-la.—Mat. 10:11.
3, 4. Couma nou kapav faire bann visite ki efficace?
3 Montré enn l’interet personnel: Kan premier fois nou joinde enn dimoune, c’est la-mem ki preparation pou enn bon visite commencé. Bann proclamateur ki prend note seki interesse dimoune ki pé ecoute zot-la, ek ki servi sa couma enn base pou bann lezot discussion, gagne bann bon resultat. Certain trouve sa bon ki a la fin sa visite-la, zot souleve enn question pou capté l’interet dimoune-la pou prochain visite. Nou l’interet sincere pou bann dimoune faire nou contigne pense zot, mem apré ki nou’nn quitte zot. Ek sa pou pousse nou pou ré-visite zot pli vite possible. Si possible, essaye visite bann dimoune-la avant ki zot l’interet diminué, setadir visite zot kitfois enn ou deux jour apré.
4 Kan ou pé faire enn visite, essaye developpe ou conversation dapré seki ou ti discuté dernier fois. Fixé l’objectif pou partage au moins enn pensée la Bible ki encourageant, chaque fois ki ou visite sa dimoune-la. Ek montré ki ou disposé pou ecouté. Aprann konn dimoune-la inpé plus. Apré sa, dan bann prochain visite, partage bann verité ki ena dan Parole Bondié ki concerne li pli directement.
5. Ki methode simple nou kapav servi pou commence bann l’etude la Bible?
5 Comprend l’importance pou commence enn l’etude la Bible: Faire bann visite avek l’objectif pou commence bann l’etude la Bible. Couma ou kapav faire sa? Dire dimoune-la ki ou ti pou content partage enn pensée interessant avek li. Lerla, ouvert ou livre Ki la Bible enseigné vrai-mem?, ek montré li enn paragraphe ki ou pensé pou interesse-li. Lire paragraphe-la ek pose question. Apré sa, discute lor enn ou-soit deux verset ki cité. Ou kapav faire sa dan 5-10 minute, devant la porte dimoune-la. Pou terminé, pose enn lot question, ek faire bann l’arrangement pou contigne conversation-la enn lot fois.
6. Couma nou kapav montré ki nou comprend l’importance pou faire bann visite?
6 Enn domaine bien important dan nou predication, c’est developpe tou l’interet ki nou trouvé. Alors, anou reserve le temps chaque semaine pou faire bann visite. Si nou faire sa, nou ministere pou vinn pli efficace ek nou pou gagne enn grand la joie.