Ed Bann “Ki Zot Leker Byin Dispoze”
1. Kisannla Zeova pe rasanble dan nu lepok?
1 Sak dimunn ena enn dispozisyon ki byin anrasine dan so leker. So leker porte lor enn sertenn kitsoz presi. (Mat. 12:35) Labib koz lor bann ki zot “leker porte lor lager.” (Psom 55:21) Sertin “porte lor la koler.” (Pro. 29:22) Me ena usi bann ki “zot leker byin dispoze pu lavi eternel.” (Akt 13:48) Dan nu lepok, Zeova pe rasanble bann dimunn ki zot leker byin dispoze. (Agai 2:7) Kuma eski nu kapav ed zot pu vinn bann adorater Zeova?
2. Sa misyon ki nu ena pu fer bann disip-la, ki li inplike?
2 Fer Bann Vizit Avek Ser-ye: Pu nu kapav akonpli nu misyon pu fer bann disip, nu bizin ena latitid ki bizin lor bann vizit. (Mat. 28:19, 20) Eski nu swiv lintere ki nu zwenn, san tarde? Eski nu vizit tu bann ki pran piblikasyon uswa ki montre lintere pu la bonn nuvel? Eski nu kontiyne fer zefor pu ed sa bann dimunn-la grandi lor plan spirityel? Pwiski bann lavi an danze, nu bizin ena dezir pu kiltiv tu lintere ki nu zwenn.
3. Ki nu bizin fer apre ki nu’nn gayn enn konversasyon avek enn kikenn dan predikasyon?
3 Alor ki enn konversasyon avek enn dimunn interese ankor fre dan u lespri, pran letan pu ekrir so non ek so ladres. Not usi size ki u’nn diskite avek li, bann verse ki u’nn lir, ek piblikasyon ki u’nn plase. Apre sa, fer u enn devwar pu returne pli vit posib.
4. Kuma nu kapav fer bann vizit ki efikas?
4 Kuma pu Fer enn Vizit: Kan u pe fer enn vizit, li bon ki u montre u amikal ek ki u montre enn lintere personel sinser pu dimunn-la. Baz u konversasyon lor Labib ek gard li sinp. Prepar enn size interesan lor ki u pu koze, ek alafin u konversasyon, sulev enn kestyon ki u pu kapav reponn dan u prosin vizit. Li bon ki u evit bann diskisyon initil lor bann lide ki dimunn-la kapav exprime me, ki kontrer ar Labib. Fer tu u posib pu konstrir apartir bann kitsoz lor ki zot tulede dakor.—Kol. 4:6.
5. Ki zefor enn pyonye ti fer, ek ki rezilta li’nn gayne?
5 Bizin zefor pu fer bann vizit, me rezilta ki nu gayne donn buku satisfaksyon. Dan Japon enn pyonye ti fixe lobzektif pu fer plis vizit sak mwa. Li ti kumans pran not tu bann ki li ti zwenn lakaz-lakaz, ek li ti vizit zot dan lespas 7 zur. Li ti prepar byin seki li ti pu dir ek li ti fer so servis, konfyan dan mesaz ki li ti pe anonse. Dan enn so bann vizit, li’nn reysi kumans enn letid avek enn dimunn ki’nn dir: “Tuletan mo finn pus zot. Se premye fwa ki mo ekute.” Perseverans sa pyonye-la finn donn bann bon rezilta. La fin dimwa li ti raport dis letid.
6. Kifer nu bizin persevere kan nu fer vizit?
6 Sityasyon bann dimunn pe tuletan sanze. (1 Kor. 7:31) Suvan nu bizin pase plizir fwa avan ki nu reysi rezwenn enn dimunn interese. Kan nu fer vizit avek serye, nu kapav ed bann ki zot leker byin dispoze pu vinn lor semin ki amenn ver lavi eternel.—Mat. 7:13, 14.