Preparation—La clé pou faire bann nouvelle visite ki efficace
1. Couma nou koné ki predication bann premier chretien ti pou faire partout lor la terre?
1 Jésus ti bien prepare so bann disciple pou zot vinn bann proclamateur efficace pou preche “la bonne nouvelle lor royaume.” (Mat. 4:23; 9:35) Jésus ti donne zot sa formation-la alors ki zot ti pé preché zis dan Palestine. Selman, avant ki li ti monte dan le ciel, Jésus ti faire koné ki so bann disciple pou preche partout lor la terre pou ki zot kapav “faire bann disciple parmi bann dimoune dan tou bann nation.”—Mat. 28:19, 20.
2. Ki nou bizin faire pou obeir commandement Jésus pou “faire bann disciple”?
2 Pou faire sa travail-la, bann proclamateur ti pou bizin revinn guette bann dimoune ki’nn manifesté l’interet pou la bonne nouvelle lor Royaume Bondié ek enseigne zot pou observe tou bann kitsoz ki Christ ti donne zot l’ordre. Pou nou kapav faire bann visit ki efficace, nou bizin bien prepare-nou.
3. Couma ou kapav ouvert chemin pou faire enn nouvelle visite dan ou premier conversation?
3 Preparé a l’avance: Certain proclamateur faire zeffort pou pose enn question a la fin premier conversation ki zot ena avek enn dimoune, ek lerla zot promette pou revini pou discute lor reponse-la. Zot finn trouvé ki, kan zot faire enn visite ek zot servi bann l’information ki ena dan livre Ki la Bible enseigné?, sa finn aide zot pou commence enn l’etude la Bible desuite.
4. Kifer fodé pa ki nou attann ki nou gagne bann nouveau periodik pou al faire enn nouvelle visite?
4 Si nou pankor gagne bann nouveau periodik, sa pa vedir ki nou bizin attann le mois apré kan nou gagne bann nouveau periodik pou al faire nou bann visite. Li possible pou augmente l’interet enn dimoune kan nou discute avek li lor bann kitsoz ki ena dan periodik ki dimoune-la deja ena.
5. Ki l’avantage ena kan nou ena enn l’objectif dan nou l’esprit?
5 Fixé enn l’objectif: Avant ou al faire visite, prend deux-trois minute pou reguette ou bann note ek reflechi lor seki ou envie faire. Par exemple, discute lor enn point ki ena dan periodik ki ou finn laisse avek dimoune-la. Ou-soit laisse enn lot publication ki koz lor sujet ki ou ti kozé la dernier fois ki ou ti joinde li. Si ou ti pose li enn question, surement ou pou envie reponn sa question-la. Faire zeffort pou lire directement dan la Bible enn verset ki appuye enn l’idée ki ou’nn mentionné.
6. Ki nou l’objectif kan nou faire bann nouvelle visite?
6 Nou l’objectif: Bien sur, nou l’objectif principal c’est pou commence enn l’etude la Bible. Enn frere ti propose enn l’etude la Bible enn missié kan li ti al visite li, mais missié-la ti refusé. Frere-la ti revini avek bann dernier periodik ek li ti dire li: “Zordi nou pé reponn enn question ki basé lor la Bible ki beaucoup dimoune posé.” Apré ki missié ti dire seki li pensé, frere-la ti lire enn verset ek enn paragraphe approprié dan enn livre ki servi pou faire l’etude. A la fin enn l’etude la Bible regulier inn commencé.
7. Couma enn bon preparation finn aide ou pou commence enn l’etude la Bible?
7 Li vaut la peine vrai-mem ki nou prend le temps pou prepare-nou pou al faire bann nouvelle visite. Nou la joie pou augmenté ek nou pou kapav ena privilege pou aide enn dimoune ki ena “l’attitude ki bizin” pou marche lor la route ki pou faire li gagne la vie.—Actes 13:48.