Couma commence bann l’etude apré ki nou’nn place bann periodik
1. Ki l’objectif nou ena kan nou pé place bann periodik?
1 Dan samedi normalement, nou presente La Tour de Garde ek Réveillez-vous ! Sa c’est selman premier pas ki nou faire pou realise nou l’objectif pou enseigne la verité bann dimoune ki sincere. Pli bas ena bann suggestion ki kapav aide nou pou place livre Ki la Bible enseigné? kan nou retourne faire visite ek apré commence enn l’etude la Bible. Ou kapav adapté sa bann suggestion-la ar ou territoire ek mette zot dan ou prop mot. Senti ou libre pou servi enn lot method si li efficace pou ou.
2. Couma nou kapav servi bann page ki ena dan commencement livre Ki la Bible enseigné? pou commence enn l’etude la Bible?
2 Servi bann page dan commencement livre: Par exemple nou kapav dire sa kan nou ré-vinn guette enn dimoune: “Sa bann magazine ki mo ti laisse avek ou-la attire l’attention lor la Bible. Guetté kifer li bien important ki nou lire la Bible.” Lire Isaïe 48:17, 18; Jean 17:3; ou-soit enn lot verset approprié. Apré ki ou finn presente livre Ki la Bible enseigné? ek ou finn donne dimoune-la enn copie, ou kapav dire sa:
◼ “La Bible donne nou enn vrai l’espoir pou l’avenir.” Montré dimoune-la page 4-5 ek demann li: “Lekel parmi sa bann promesse-la ou ti pou content trouve li realisé?” Montré dimoune-la chapitre ki koz lor sa promesse biblik ki li finn choisiré-la, ek examine enn ou deux paragraphe pou enn ti moment si dimoune-la permette.
◼ Ou-soit ou kapav dire: “La Bible reponn bann question ki pli important dan la vie.” Attire l’attention dimoune-la lor page 6, ek demann li si li finn deja reflechi lor bann question ki posé enba. Rod chapitre ki donne reponse sa question-la, discute pou enn ti moment enn ou deux paragraphe.
◼ Ou kapav aussi montré li certain titre ki ena dan la liste bann chapitre ek demann li ki sujet ki interesse li. Rod chapitre-la, ek montré li pou enn ti moment couma enn l’etude deroulé.
3. Couma nou kapav commence enn l’etude apré ki nou finn place bann periodik ki koz lor (a) condition ki pé deterioré dan le monde? (b) la famille? (c) eski nou kapav faire la Bible confiance?
3 Laisse enn question en suspense: Enn lot kitsoz ki ou kapav faire c’est prepare terrain pou enn prochaine visite, pendant ou premier conversation avek dimoune-la. Apré ki dimoune-la inn accepté bann periodik, pose enn question ek promette li ki ou pou reponn question-la kan ou ré-vinn guette li. Faire tou seki ou kapav pou faire bann l’arrangement clair avek dimoune-la, ek apré, faire sur ki ou pou respecté sa rendez-vous-la. (Mat. 5:37) Kan ou retourne faire visite, rappel dimoune-la question ki ou ti soulevé, ek pou enn ti moment, lire ek discute lor so reponse dan livre Ki la Bible enseigné? Donne li enn livre pou ki li kapav suive. Ala dé-trois l’exemple:
◼ Si periodik ki ou finn placé koz lor bann condition ki pé deterioré dan le monde, ou kapav dire: “Ki changement Bondié pou amené lor la terre? La prochaine fois nou kapav discute lor reponse ki la Bible donné pou sa question-la.” Servi page 4-5 kan ou ré-vini. Ou-soit ou kapav pose sa question-la: “Eski c’est volonté Bondié ki nou gagne bann malheur?” Kan ou ré-vinn visite dimoune-la, montré li paragraphe 7-8 dan chapitre 1.
◼ Si periodik ki ou finn placé koz lor la famille, avant ki ou quitte dimoune-la ou kapav demann li: “Ki chaque membre la famille kapav faire pou ki zot la-vie famille vinn pli heureux?” Kan ou ré-vinn visite dimoune-la examine paragraphe 4 dan chapitre 14.
◼ Si periodik ki ou finn placé koz lor eski nou kapav faire la Bible confiance, ou kapav pose sa question-la pou ou reponn li enn prochaine fois: “Eski la Bible exact lor plan scientifik?” Kan ou retourne visite dimoune-la, examine paragraphe 8 dan chapitre 2.
4. Ki nou pou faire si enn dimoune pa accepté livre Ki la Bible enseigné?
4 A la fin chaque discussion, pose enn lot question ki ou pou reponn dan ou prochain visite. Enn fois ki enn l’etude regulier inn etabli, examine sa livre-la depuis commencement ziska la fin. Ki ou pou faire si dimoune-la pa accepté livre Ki la Bible enseigné? Ou kapav toujours contigne amenn bann periodik pou li ek gagne bann conversation lor Bible ar li. Tigit par tigit, pendant ki ou pé nourri so l’interet, avek le temps li kapav accepté enn l’etude la Bible.
5. Kifer nou bizin faire tou pou pa zis laisse bann periodik ar bann dimoune?
5 La Tour de Garde ek Réveillez-vous ! kapav pousse enn dimoune pou envie aprann seki la Bible enseigné vrai-mem. Alors anou faire enn zeffort special pou commence bann l’etude la Bible avek bann ki accepté bann periodik. Coumsa, nou pou obeir bann instruction ki Jésus ti donne nou pou “faire bann disciple . . . , enseigne zot.”—Mat. 28:19, 20.