Amelior Nou Bann Kapasite dan Nou Minister—Ofer Liv Ki la Bible enseigné?

Kifer Li Inportan: Liv Ki la Bible enseigné? se zouti prinsipal ki nou servi pou ansegne. Me, avan ki nou servi sa liv-la pou etidie avek enn kikenn, nou bizin prezant liv-la dabor. Alor, nou bizin fer tou seki nou kapav pou vinn efikas dan fason ki nou prezant liv Ki la Bible enseigné? dan predikasion. (Prov. 22:29) Ena plizir fason pou prezant sa liv-la, ek bann proklamater bizin servi metod ki mars pli bien pou zot.

Kouma To Kapav Fer Sa:

Poz enn kestion ki pou interes dimounn-la pou ki to kapav diriz so latansion lor enn sapit dan sa liv-la. To kapav osi swazir enn parmi bann kestion ki trouv dan koumansman sak sapit. Apre ki dimounn-la finn reponn twa, lir enn verse ki apropriye. Apre sa, montre li enn paragraf ki koz lor sa size-la ek kitfwa to kapav koz lor sa avek li pou enn ti moman.
Enn lot metod se kan to servi bann paz dan koumansman liv-la pou fer dimounn-la interese. Apre, montre li kotsa dan liv-la li kapav gagn bann repons ki sorti dan Labib. Par exanp, to kapav fer referans ar enn maler ki’nn fek arive ek explik li kouma boukou dimounn pe rod repons pou bann kestion ki trouv lor paz 3. Enn lot posibilite: to kapav dir li ki to pe vizit to bann vwazin pou partaz enn panse pozitif lor lavenir. Apre sa, montre li bann zimaz ki trouv lor paz 4-5 ek demann li: “Lekel parmi sa bann promes-la ou ti pou kontan trouv realize?” Ouswa to kapav dir ki to pe fer enn ti vizit pou ed bann dimounn pou trouv repons bann gran kestion dan lavi. Apre sa, montre dimounn-la bann kestion ki trouv anba lor paz 6, ek demann li lekel ki pli interes li.
Servi enn metod direk pou koumans enn letid Labib. To kapav dir: “Nou pe montre nou bann vwazin enn liv ki nou servi pou etidie Labib. Eski ou finn deza trouv sa avan? [Les dimounn-la reponn.] Eski mo kapav montre ou, dan zis de-trwa minit, kouma ou kapav servi sa liv-la avek ou prop Labib?”

Pandan Sa Mwa-la, Esey Sa:

Pratik bann model demonstrasion dan to ladorasion an fami.
Kan to dan predikasion, partaz avek lezot proklamater seki to pe pans pou dir. (Prov. 27:17) Sanz to prezantasion si to pa trouv li efikas.