Bann Tourne Peryodik—Efikas pou Koumans Bann Letid Labib
1. Kifer depi bien lontan lorganizasion Jéhovah inn ankouraz bann proklamater pou fer bann tourne peryodik?
1 Boukou dimounn pa interese pou etidie Labib avek nou, me zot kontan lir nou bann magazinn. Akoz sa, depi bien lontan lorganizasion Jéhovah inn ankouraz bann proklamater pou fer bann tourne peryodik. Parski bann dimounn regilierman lir nou bann magazinn, souvan sa motiv zot pou anvi konn plis lor Parol Bondie. (1 Pierre 2:2) Avek letan, enn kitsoz ki zot lir kapav tous zot ek pous zot pou aksepte enn letid Labib.
2. Kouma nou kapav swiv lintere bann dimounn avek ki nou fer tourne peryodik?
2 ‘Aroz’ Bann Lagrin Laverite: Olie ki ou zis kit bann magazinn avek enn dimounn, koumans enn konversasion avek li ek esey fer so konesans. Sa pou ed ou konn so sitiasion, seki interes li, ek so bann krwayans, ki pou permet ou kone lor ki size ou kapav koz avek li. (Prov. 16:23) Prepar ou pou sak vizit. Si posib, pou enn ti moman atir latansion dimounn-la lor enn pwin ek enn verse ki pe apiy sa pwin-la dan bann magazinn-la. Kan ou fer sa, ou pe aroz bann lagrin laverite ki kapav ena dan so leker. (1 Cor. 3:6) Sak fwa, not dat ki ou al vizit dimounn-la, piblikasion ki ou kit avek li, ek size ek verse ki ou examine avek li.
3. Apre komie letan nou bizin revizit bann dimounn avek ki nou fer tourne peryodik?
3 Apre Komie Letan Ou Bizin Retourne? Ou bizin retourne enn fwa par mwa pou donn bann dimounn avek ki ou fer tourne peryodik bann dernie magazinn. Me ou kapav swazir pou vizit dimounn-la pli souvan, depandan ou sitiasion ek ki kantite dimounn-la interese. Par exanp, enn ouswa de semenn apre ki ou’nn kit bann magazinn avek dimounn-la, ou kapav retourne ek dir: “Mo’nn pase pou enn ti moman pou atir ou latansion lor enn pwin dan bann magazinn ki mo ti kit avek ou.” Sa pou motiv dimounn-la pou lir enn lartik an partikilie. Si li’nn fini lir lartik-la, ou kapav demann li seki li panse lor la ek examinn lartik-la pou enn ti moman avek li. Si dimounn-la kontan lir nou bann piblikasion, ou kapav osi retourne ek ofer li bann trak, brosir ouswa liv ki nou pe prezante pou sa mwa-la.
4. Detanzantan, ki nou kapav fer pou kone si bann dimounn avek ki nou fer tourne peryodik interese pou koumans enn letid Labib?
4 Pa atann dimounn-la demann ou enn letid Labib. Pran linisiativ. Mem si dan lepase li pa’nn aksepte enn letid Labib, detanzantan ou kapav atir so latansion lor lartik “Repons pou Bann Kestion Biblik” dan Latour Degard ek gete si li dispoze pou koz lor la. Kitfwa ou kapav koumans enn letid devan laport dimounn-la. Selman, si ou pa reisi koumans enn letid Labib, ou kapav kontign amenn bann magazinn pou li pou kontign swiv so lintere.