Developpe l’interet bann dimoune grace a enn tournée periodik
1. Couma nou kapav developpe l’interet bann dimoune grace a enn tournée periodik?
1 Beaucoup dimoune ki nou joinde dan predication bien content kan nou al visite zot, ek zot bien content lire nou bann publication, mais zot hesité pou commence enn l’etude la Bible. Enn fason ki nou kapav developpe zot l’interet c’est par enn tournée periodik. Kan ou place bann periodik, note nom ek l’adresse dimoune-la, ki date ou’nn visite-li, bann periodik ki dimoune-la finn prend, ek verset ki ou’nn partage avek li. Note aussi seki ou pensé kapav interesse dimoune-la. Kan ena bann nouveau periodik, rod bann point ki pou interesse bann dimoune avek ki ou laisse bann periodik, ek attire zot l’attention lor la, kan ou al visite zot. (1 Cor. 9:19-23) Avek le temps, kitfois zot pou lire enn kitsoz dan nou bann periodik ki pou capté zot l’interet ek faire zot envie konn plus.
2. Kifer li important ki bann dimoune rod Jéhovah zordi, ek ki nou kapav faire encore pou aide zot?
2 Nou reconette kan-mem, ki la plupart dimoune pa pou vinn bann serviteur Jéhovah si zot zis lire bann periodik par zot-mem. Nou koné ki reste bien tigit lé-temps pou bann dimoune rod Jéhovah zordi. Alors, ki nou kapav faire encore pou aide zot? (Tseph. 2:2, 3; Rév. 14:6, 7) Nou kapav developpe zot l’interet si, chaque fois ki nou al quitte bann periodik, nou partage enn text la Bible avek zot.
3. (a) Couma nou kapav prepare enn serie discussion basé lor enn text la Bible? (b) Ki bann kitsoz ki pli tracasse bann dimoune dan ou territoire?
3 Bann discussion basé lor enn text la Bible: Pense bann dimoune avek ki ou laisse bann periodik regulierement, ek pou chaque dimoune, prepare enn serie discussion basé lor enn text la Bible ki adapté ar so besoin. (Phil. 2:4) Par exemple, si enn kikenn inn fek perdi enn membre so famille, ou kapav rann li plusieurs visite pou partage seki la Bible dire lor condition bann mort ek l’esperance la resurrection. Ou kapav servi bann l’idée ki trouve dan livre Comment raisonner enba titre “Mort” ek “Résurrection” pou prepare sa bann discussion-la. Ou kapav aussi koz lor bann lezot sujet ki ena enn rapport avek sa, par exemple, couma Bondié pou tire la maladie, la vieillesse, ek la mort. Seki important c’est trouve enn kitsoz ki interesse dimoune-la, ek tigit par tigit montré li seki la Bible dire lor la.
4. Kifer li important ki nou aide lezot pou comprend bann verset la Bible ki nou servi, ek couma nou kapav faire sa?
4 Aide lezot pou comprend: Mem si en general, li pli bon ena bann conversation ki simple ek courte, nou bizin faire plus ki zis lire enn verset ki nou’nn choisir. Satan finn aveuglé l’esprit bann dimoune, pou ki zot pa trouve la bonne nouvelle. (2 Cor. 4:3, 4) Mem bann dimoune ki konn la Bible, bizin l’aide pou comprend sa livre-la. (Actes 8:30, 31) Alors, prend lé-temps pou donne bann l’exemple ek pou explik bann text la Bible, pareil couma ou ti pou faire dan Lekol ministere theocratik. (Actes 17:3) Li important ki dimoune-la comprend ki Parole Bondié kapav aide li dan so prop la-vie.
5. Couma enn tournée periodik kapav vinn enn l’etude la Bible?
5 Si dimoune-la content seki li pé aprann, tigit par tigit nou kapav koz enn tipé plus avek li, ek servi deux ou-soit trois text la Bible, chaque fois ki nou al visite li. Rod enn l’occasion pou presente brochure Ki Bondye Pe Demann Nu? ou-soit livre Konesans Ki Amenn Ver Lavi Pu Tuletan. Coumsa enn tournée periodik kapav vinn finalement enn l’etude la Bible.