Amelior Nou Bann Kapasite dan Nou Minister—Al Kit Bann Nouvo Peryodik Regilierman

Kifer Li Inportan: Boukou dimounn kontan lir nou bann peryodik, me zot pa anvi etidie Labib. Kitfwa se parski zot kontan zot relizion ouswa zot panse zot pena ase letan pou etidie. Me amezir zot lir nou bann magazinn, sa kapav fer zot anvi konn plis lor Labib. (1 Pier 2:2) Enn lartik kapav tous zot leker, ouswa zot sitiasion kapav sanze. Bann ti vizit ki nou fer regilierman kot sa bann dimounn-la, kapav met zot alez. Sa ed nou osi pou kone ki kitsoz interes zot ouswa trakas zot. Alafin, kitfwa nou kapav koumans letid avek zot.

Kouma To Kapav Fer Sa:

Sak mwa, rezerv enn letan pou al kit bann dernie Latour Degard ek Réveillez-vous ! ar dimounn-la. Kitfwa to kapav vizit li enn lot moman pandan sa mwa-la pou atir so latansion lor enn lartik dan bann magazinn ki to’nn kite. To kapav osi prezant li piblikasion ki pe ofer sa mwa-la. Not bien ki bann peryodik to’nn lese.—Get Nou Minister Zanvie 2014, p. 3.
Prepar twa bien pou sak vizit. Olie ki to zis kit bann peryodik, esey gagn enn konversasion avek dimounn-la. Esey fer kamarad avek li. Koumsa to pou kapav devlop so lintere.
Vey bann lokazion pou koumans letid. Ki to pou fer si dimounn-la demann twa ki Labib dir lor enn sertenn size? Amenn enn piblikasion ki servi pou fer letid kot ena repons sa kestion-la ek examinn size-la ansam avek li. Avan to kit dimounn-la, soulev enn kestion ek examinn sa dan prosin vizit. Si sak fwa to zwenn dimounn-la to servi Labib ouswa enn nou bann piblikasion, mem si to pa’nn fer enn long konversasion, savedir to pe kondir enn letid. Eski to’nn ofer li brosir Enn Bon Nouvel ek to’nn montre li kouma enn letid deroule? Eski to’nn montre li bann ti-video Kifer Li Bon Etidie Labib? ek Kouma enn Letid Labib Deroule? Mem si dan lepase dimounn-la pa’nn aksepte enn letid, kitfwa so sitiasion inn sanze. To pa panse li bon to re-esey propoz li letid?

Pandan Sa Mwa-la, Esey Sa:

Fer enn lalis bann dimounn avek ki to kapav kit bann nouvo peryodik regilierman. Ofer zot bann dernie magazinn, ek dir zot ki prosenn fwa to pou amenn bann nouvo nimero.