Parol Bondye Li Laverite
1. Ki ranseynman inportan ena dan Labib?
1 Enn ekrivin Psom finn ekrir: “Tu seki ena dan to parol li laverite.” (Psom 119:160) Atraver so Parol ki inspire, Zeova donn nu bann repons ki satisfer nu lor bann kestyon inportan ki nu poze dan lavi. Li donn sulazman ek lespwar bann ki dan difikilte. Ek Li montre nu kuma nu kapav vinn pros ar Li. Enn madam byin rekonesan finn dir: “Kan enn kikenn pe aprann laverite ki ena dan Labib, se kumadir li pe kit enn landrwa mosad kot fer byin-byin nwar ek li pe rant dan enn lasam kler, kot ena lalimyer ek kot fer bon pu reste.” Eski u fer zefor pu fer lezot konn laverite ki sorti dan Parol Bondye, sak fwa ki u gayn lokazyon?
2. Kuma eski Labib amelyor lavi bann dimunn?
2 Labib Kapav Atir Bann Dimunn dan Lemond Antye ek Sanz Zot Lavi: Laverite ki ena dan Labib ena puvwar pu tus leker bann dimunn ek sanz zot lavi. (Ebre. 4:12) Enn zenn madam ki apel Rosa, ti tom dan prostitisyon, lalkol ek ladrog. Li dir: “Enn zur, alor ki mo ti’nn tom dan dezespwar, enn kup Temwin finn koz ar mwa. Zot finn explik mwa kuma Labib kapav rezud nu bann problem. Mo finn kumans etidye Parol Bondye, ek mo finn truv sa extraordiner. Dan enn mwa, mo finn gayn lafors pu kumans enn nuvo lavi. Asterla ki mo lavi ti’nn ena enn bi, mo ti nepli bizin lalkol ek ladrog. Ek parski mo ti byin anvi vinn kamarad Zeova, mo ti byin deside pu swiv so bann prinsip. Si pa ti ena sazes pratik dan Parol Bondye, mo sir ki mo ti pu fini swisid mwa.”—Ps. 119:92.
3. Kifer fode pa nu tini-tini pu partaz sa mesaz Labib la avek lezot?
3 Labib pa parey kuma laplipar bann liv zordi. Li atir bann dimunn dan “tu nasyon, tribi, lepep ek lang.” (Rev. 7:9) Volonte Bondye se “ki tut sort kalite dimunn sape ek gayn enn konesans egzak lor laverite.” (1 Tim. 2:4) Donk, fode pa vit-vit nu tir konklizyon ki enn dimunn pa pu ekut bon nuvel, zis parski li viv dan enn sertin lanvironnman. Okontrer nu bizin partaz sa mesaz Rwayom la avek zot tu, ek montre seki ena direkteman dan Labib otan ki posib.
4. Kuma eski nu kapav servi Labib kan nu pe donn enn temwaynaz?
4 Met laksan lor Labib: Ena enn kantite lokazyon kot nu kapav servi Labib dan predikasyon. Kan nu pe prezant bann magazinn, sey servi pasaz Labib ki paret dan prezantasyon pu bann magazinn. Sertin finn truv li bon ki, kan zot pe ofer piblikasyon ki prezante pu le mwa, zot lir dan zot lintrodiksyon enn tex Labib apropriye ki zot finn swazir. Sak fwa ki u fer bann vizit, fer zefor pu montre enn uswa de pasaz Labib. Kumsa u kapav ed dimunn ki pe ekut u pu ofmant so konesans dusma-dusma. Kan u pe fer enn letid Labib, li bon ki u diskisyon baze lor bann pasaz Labib ki inportan. Mem si u pa pe prese, li bon ki u ena enn Labib avek u. Kumsa, kuma enn lokazyon prezante u kapav donn enn temwaynaz okazyonel.—2 Tim. 2:15.
5. Kifer eski nu bizin fer zefor pu servi Labib dan nu predikasyon?
5 Anu ed lezot pu tir profi grasa puvwar laverite ki truv dan Parol Bondye ek ki pus nu pu azir. Kuma nu kapav fer sa? Se kan nu servi Labib sak fwa nu gayn lokazyon dan predikasyon.—1 Tes. 2:13.