Bann Parol Felisitasyon Ankuraz Lezot
1 Letan li pe al dormi, enn tipti tifi plor-plore ek demann so mama: “Mami, eski mo pa’nn fer bon tifi zordi?” Sa kestyon-la ti etonn so mama. Malgre ki mama-la ti’nn remarke ki kantite zefor so tipti tifi ti pe fer pu byin konport li sa zur-la, li pa finn mem pans pu felisit li. Bann larm ki sa tipti tifi-la inn verse, rapel nu enn kitsoz byin inportan: nu tu, ki nu zenn uswa vye, nu bizin ki lezot felisit nu. Eski nu ankuraz lezot kan nu felisit zot kan bizin?—Pro. 25:11.
2 Nu bann konpaynon Kretyin donn nu enn kantite bon rezon pu felisit zot. Bann ansyin, bann asistan ministeryel, ek bann pyonye travay dir pu akit byin zot bann responsabilite. (1 Tim. 4:10; 5:17) Bann paran ki ena la krint pu Zeova fer tu seki zot kapav pu elve zot zanfan dan la verite. (Efe. 6:4) Bann zenn Kretyin lite pu reziste kont “lespri sa lemond-la.” (1 Kor. 2:12; Efe. 2:1-3) Lezot pe servi Zeova fidelman malgre zot laz avanse, zot bann problem la sante ek lezot leprev. (2 Kor. 12:7) Tu sa bann dimunn-la merit nu felisitasyon. Eski nu exprim nu apresyasyon pu zefor ki zot fer?
3 Anu Felisit Sak Dimunn Personelman ek pu enn Rezon Presi: Nu tu vremem byin kontan kan, lor lestrad, adres bann felisitasyon pu la kongregasyon. Me selman, nu plis ankuraze ankor kan felisit nu personelman. Par egzanp, dan Romin sapit 16, Pol mansyonn bann rezon presi pu kifer li felisit Febe, Priska ek Akila, Trifenn ek Trifoz, ek Persis, ek lezot ankor. (Rom. 16:1-4, 12) Sirman so bann parol ti byin ankurazan pu sa bann fidel serviter Zeova-la! Wi, kan nu felisit nu bann frer ek ser, nu fer zot santi aki pwin nu bizin zot ek sa fer nu vinn pli pros ar zot. Eski resaman, u’nn gayn lokazyon felisit kikenn personelman, pu enn rezon presi?—Efe. 4:29.
4 Bann Parol Felisitasyon Ki Sorti dan Leker: Pu ki enn parol felisitasyon ankuraz lezot vremem, li bizin sinser. Dimunn kapav kone kan nu sinser uswa kan nu pe sinpleman ‘flat zot avek nu lalang.’ (Pro. 28:23) Amezir nu fer zefor pu remark seki bon dan lezot, nu pu santi nu leker puse pu felisit zot. Alor, san ezite, anu felisit lezot sinserman, sak fwa ki lokazyon prezante, parski nu kone ki “enn parol prononse dan bon moman, O ! Kuma li bon!”—Pro. 15:23.