Encourage nou camarade kan nou dan predication
1 Nou tou apprecié kan nou gagne ‘enn parole encourageant dan bon moment.’ (Prov. 25:11) Kan nou preche avek lezot proclamateur, couma nou kapav veillé ki nou conversation encourage lezot?
2 Enn conversation encourageant: Nou tire beaucoup profit kan nou discute avek nou bann frere ek soeur lor bann sujet spirituel pendant predication! (Ps. 37:30) Nou kapav koz lor nou presentation ou-soit raconte bann l’experience ki nou finn fek gagné dan predication. (Actes 15:3) Eski nou finn aprann enn kitsoz interessant dan nou lecture la Bible personnel, dan bann dernier periodik, ou-soit dan enn reunion? Nou kapav discute lor bann point ki finn presenté dan enn discours publik ki nou finn fek tendé dan la Salle du Royaume.
3 Kitfois nou kapav senti-nou decouragé kan enn dimoune souleve enn objection ki nou pa finn kapav reponn. Apré ki nou finn quitte dimoune-la, kitfois li pou bon pou prend deux-trois minute pou discute avek nou compagnon dan ki fason kapav reponn sa objection-la dan l’avenir kitfois avek l’aide livre Comment raisonné. Si nou finn trouve enn kitsoz interessant dan presentation nou compagnon, nou kapav felicite li sincerement, sa surement pou bien encourage li.
4 Prend l’initiative: Eski ena certain dan nou l’etude de livre avek ki nou pa finn preché depuis longtemps? Si nou invite zot pou accompagne nou dan nou ministere, sa kapav permette ki ena “enn l’echange l’encouragement.” (Rom. 1:12) Bann pionnier permanent ek auxiliaire content kan lezot proclamateur travail avek zot, surtout boner gramatin ou-soit tard dan l’apré-midi, kan ena moins proclamateur dan predication. Nou kapav soutenir bann pionnier kan nou sorti avek zot dan predication. Eski ena enn proclamateur ki so la-santé pa bon ek ki a cause sa pa kapav faire beaucoup dan predication? Si nou faire l’arrangement pou ki li accompagne nou, kitfois dan enn l’etude la Bible, nou toulé-deux kapav tire profit.—Prov. 27:17.
5 Bann felicitation ek bann parole ki montré nou l’appreciation mem dan bann ti kitsoz, toujours encourage lezot. Nou bizin garde sa dan nou l’esprit kan nou preche avek bann lezot proclamateur, parski nou envie ‘contigne fortifié sakenn nou camarade.’—1 Thess. 5:11.