Vinn enn bon compagnon de porte en porte
1. Ki bienfait ena kan nou travail avek enn lot proclamateur dan predication?
1 Dan enn certaine l’occasion, Jésus ti envoye 70 disciple preché, ek li “ti envoye zot deux par deux.” (Luc 10:1) Pena doute ki sa disposition-la ti permette so bann disciple pou aide sakenn so camarade pendant ki zot ti pé preché. Kan nou accompagne enn lot proclamateur dan predication, couma nou kapav aide li?
2. Kan nou compagnon pé faire so presentation, couma ek kifer nou bizin ecouté?
2 Ecouté: Ecoute bien kan ou compagnon pé faire so presentation. (Jacq. 1:19) Kan li lire enn passage la Bible, suive dan ou la Bible. Si ou compagnon ou-soit dimoune en face-la pé kozé, guette li kan li kozé. Si ou ecoute bien la conversation, sa kapav encourage dimoune-la pou faire pareil.
3. Kan eski nou compagnon ti pou content ki nou kozé?
3 Discerné kan ou pou kozé: Kan nou avek enn proclamateur ki pé faire so presentation, nou pou montré ki nou donne li dignité kan nou laisse li dirige conversation-la. (Rom. 12:10) Nou bizin evite coupe so conversation. Si li blié seki li ena pou dire, ou-soit si dimoune ki en face-la souleve enn l’objection ou-soit pose enn question ek ki nou compagnon bizin l’aide, nou contigne lor so conversation au lieu ki nou commence koz lor enn sujet different. (Prov. 16:23; Eccl. 3:1, 7) Si nou kozé, nou bann parole bizin ajoute lor temoignage ki pé donné.—1 Cor. 14:8.
4. Ki kitsoz ki pou faire nou gagne encore plus la joie ek bon resultat dan nou ministere?
4 Kan sa 70 disciple-la ti fini preché, zot ti “retourné avek beaucoup la joie.” (Luc 10:17) Nou aussi nou pou ena la joie dan nou ministere kan nou ecoute ek kan nou discerné kan nou bizin aide bann avek ki nou travail dan predication de porte en porte.