Pa Res Trankil kan Ou Avek Ou Konpagnon Servis
1. Kouma nou kapav imit lapot Paul kan nou pe travay avek lezot dan nou minister?
1 Lapot Paul ti konsider letan ki li ti pase avek so bann konpagnon Kretien kouma enn lokazion pou ena “enn lesanz lankourazman.” (Rom. 1:12) Kan ou travay ansam avek enn lot proklamater dan ou minister, eski ou profit sa letan-la pou ankouraz li ek ed li? Olie ki ou res trankil, kifer ou pa partaz bann pwin ki finn ed ou pou vinn enn bon proklamater?
2. Ki nou kapav fer pou ki nou konpagnon servis gagn plis konfians an limem, ek kifer sa li inportan?
2 Fer Li Gagn Plis Konfians an Limem: Sertin proklamater mank konfians an zotmem, ek nou trouv sa lor lexpresion zot figir ouswa dan ton zot lavwa. Nou kapav ed zot pou gagn plis konfians kan nou felisit zot sinserman. Kouma nou kapav ed zot ankor? Enn sirveyan itineran san ezite dir so konpagnon ki bann lakrint li ena ek kouma souvan li priye pou vink sa bann santiman-la. Enn lot frer explike ki’nn ed li pou ena konfians. Li dir: “Tou koumans avek enn sourir. Parfwa, mo bizin priye pou kapav fer sa ti sourir-la.” Eski ena kitsoz ki’nn ed ou pou ena plis konfians an oumem dan ou minister? Ou kapav partaz sa avek ou konpagnon servis.
3. Ki bann lide nou kapav partaz avek nou konpagnon pou ed li vinn pli efikas dan so minister?
3 Partaz Ou Bann Metod: Eski ou finn trouv enn fraz ouswa enn kestion efikas, kitfwa konsernan enn levennman dan ou teritwar, pou koumans enn konversasion? Eski ou finn gagn bann bon rezilta kan ou’nn azout enn lide dan enn model prezantasion? Ou kapav partaz sa avek ou konpagnon. (Prov. 27:17) Kan ou pe al fer enn nouvel vizit, ou kapav partaz avek ou konpagnon ou lobzektif pou sa vizit-la, ek ki ou pe pans pou fer pou realiz sa lobzektif-la. Apre ki ou’nn fini fer enn letid Labib, ou kapav explik ou konpagnon kifer pou sa etidian-la ou’nn swazir enn sertenn pwin, verse, ouswa metod lansegnman.
4. Kifer nou bizin interese pou ed nou bann konpagnon dan nou minister?
4 Bann predikater dan premie siek pa ti zis interese pou ed bann ki pa servi Jéhovah. Zot ti osi trouv linportans pou ankouraz ek fortifie zot bann frer. (Actes 11:23; 15:32) Lapot Paul ti form Timothée ki ti zenn ek ti ankouraz li pou partaz seki li ti aprann avek lezot. (2 Tim. 2:2) Kan nou fer dibien anver nou bann konpagnon Kretien dan nou minister, nou pa zis ogmant zot lazwa ek ed zot pou vinn pli efikas, me nou osi fer plezir nou Papa ki dan Lesiel.—Héb. 13:15, 16.