Amelior Nou Bann Kapasite dan Nou Minister—Vinn enn Bon Konpagnon

Kifer Li Inportan: Jésus ti rekonet linportans pou ena enn konpagnon dan predikasion. Alor, kan li ti avoy so 70 disip pou al prese, li ti avoy zot de par de. (Luc 10:1) Kouma nou konpagnon kapav ed nou dan predikasion? Li kapav donn nou led ki bizin si zame nou gagn enn difikilte ouswa si nou pa pe kone kouma pou reponn enn kestion. (Eccl. 4:9, 10) Li kapav partaz so lexperyans ek parfwa donn bann sigzesion ki pou ed nou vinn enn proklamater pli efikas. (Prov. 27:17) Ant de laport, li kapav osi ankouraz nou par bann konversasion ki pou batir nou lafwa.—Phil. 4:8.

Kouma To Kapav Fer Sa:

Ekout bien kan to konpagnon pe prese. (Jacq. 1:19) Kan li pe lir enn verse, swiv dan to Labib. Koumsa to pou pli kapav ed li, si zame li bizin led.
Servi to bon zizman pou kone si to bizin rant dan konversasion-la ek kan to bizin fer li. (Prov. 25:11) Si to pe akonpagn enn proklamater dan enn letid, li pou bien apresie to bann komanter ki to fer detanzantan. Me, kan to pe prese lakaz-lakaz, to konpagnon pou prefer ki to les li koze kan ariv so tour. Biensir, si to konpagnon li enn nouvo proklamater ouswa li pa pe tro kone kouma pou reponn enn kestion ouswa sirmont enn obzeksion, sirman li pou apresie to led. Me si to pe akonpagn enn proklamater dan predikasion, dan enn vizit, ouswa dan enn letid, pa koup li ek kontign so konversasion, ouswa mem sanz so size konversasion.
Partaz to lexperyans. Si detanzantan to kapav donn to konpagnon enn sigzesion ki pou ed li pou vinn pli efikas dan predikasion, alor pa ezite. (Prov. 3:27) Enn moman ki apropriye, to kapav dir li: “Kouma to’nn trouv sa inn pase?” ouswa “Eski mo kapav donn twa enn sigzesion?” ouswa mem “To kone, mo’nn sey sa.” Rapel enn kitsoz: To konpagnon pou kontan si detanzantan to donn li bann sigzesion, me sa kapav dekouraz li si sak fwa to tir tou ti lay.

Pandan Sa Mwa-la, Esey Sa:

Apre ki to’nn akonpagn enn proklamater dan predikasion, dir li ki bann kitsoz ki li’nn dir ouswa fer ki montre ki li enn bon konpagnon.