Montré enn l’interet sincere—Kan nou felicite lezot
1 Bann felicitation sincere encourage bann dimoune, motive zot, ek donne zot la joie. Beaucoup proclamateur finn remarké ki si zot dire enn ti parole sincere pou felicite bann dimoune, souvent bann dimoune-la pli disposé pou ecouté. Couma nou kapav felicite bann dimoune kan nou pé partage la bonne nouvelle avek zot?
2 Kan nou observé: Apré ki li’nn retourne dan le ciel, Jésus Christ ti remark bann bon action ki sa sept congregation dan l’Asie Mineure-la ti faire. (Rév. 2:2, 3, 13, 19; 3:8) Nou aussi nou kapav faire pareil. Enn l’interet sincere pou bann dimoune ki nou joinde dan predication, pou pousse nou pou rod bann l’occasion pou felicite zot. Par exemple, enn la-cours ki bien propre, enn parent ki pé montré l’amour pou so zenfant, ou-soit enn dimoune ki ouvert la porte avek enn sourire ek ki accueil nou bien. Sa c’est bann bon l’occasion pou felicite lezot. Eski ou remark sa bann kitsoz-la ek ou saisi bann l’occasion pou felicite lezot?
3 Kan nou ecoute bien: Kan ou pé preché, pose bann question approprié pou invite bann dimoune pou exprime zot. Montré ki ou ena respé pou zot kan ou ecoute bien seki zot dire. (Rom. 12:10) Coumsa, ou pou kapav trouve enn kitsoz pou felicite dimoune-la sincerement, ek lerla ou kapav batir ou conversation lor enn sujet kot toulé-deux d’accord.
4 Servi nou discernement: Mais ki ou pou faire si dimoune-la dire enn kitsoz ki pa en accord avek la verité ki ena dan la Bible? Au lieu ki ou essaye corrige li, remercié li plutot pou seki li’nn dire ek contigne ou conversation. Par exemple, ou kapav dire: “Mo trouvé ki ou’nn bien reflechi lor sa question-la.” (Col. 4:6) Mem si enn dimoune pa d’accord lor enn sujet, souvent nou kapav felicite li pou grand l’interet ki li ena pou sa sujet-la. Si nou agir coumsa, sa kapav calmé enn dimoune ki parette bien opposé ar nou message.—Prov. 25:15.
5 Si nou envie ki nou felicitation ena valeur, fodé ki li sorti dan nou leker. Kan nou encourage lezot par bann felicitation, sa honore Jéhovah ek sa kapav aussi attire bann dimoune vers message Royaume Bondié.