Montré enn l’interet sincere—Kan ou observé
1 Plus ki n’importe kisannla, Jéhovah ek Jésus Christ kapav reconette bann besoin precis ki dimoune ena, ek aide zot. (2 Chron. 16:9; Mark 6:34) Kan nou joinde bann dimoune dan predication ek kan nou reconette seki interesse zot ek seki tracasse zot, nou pou kapav adapté nou presentation ar zot kan nou preche la bonne nouvelle.
2 Prend compte bann detail: Jésus ti konn observé. (Marc 12:41-43; Luc 19:1-6) Nou aussi pareil, kan nou devant la porte enn dimoune, nou kapav observe bann decoration ki concerne so religion, bann slogan lor so vehicule, ou-soit bann zouzou ki ena dan la cour. Kitfois sa pou donne nou l’occasion pou donne enn temoignage efficace lor la bonne nouvelle.
3 Nou kapav konn sentiment enn dimoune kan nou observe so comportement ek so figure. (Prov. 15:13) Li possible ki dimoune-la bizin consolation parski enn kikenn ki li content finn mort, ou-bien parski li pé passe par bann situation difficile. Kitfois dimoune-la pou content si nou lire avek li bann verset ki adapté ar so situation. (Prov. 16:24) Eski dimoune-la pressé ou-soit li ena enn ti-baba ki pé ploré dan so lé-bras? Si oui, kitfois li ti pou pli bon ki nou faire l’arrangement pou ré-vini enn lot fois. Kan nou ena consideration ek kan nou ‘mette-nou dan so place,’ sa pou faire dimoune-la ecoute nou kan nou ré-vini.—1 Pierre 3:8.
4 Adapté ou bann reponse: L’apotre Paul ti remarké ki ti ena enn l’autel dan Athènes, ki ti dedié “pou enn Bondié ki personne pa koné.” Sa ti ena enn l’effet lor fason ki li ti presente la bonne nouvelle, parski li ti dire zot: “Seki zot pé adoré sans ki zot koné, c’est sa-mem ki moi mo pé vinn annonce zot.” Avek tact, Paul ti servi enn method ki ti pousse certain ki ti là pou ecoute message lor Royaume Bondié, ek pou vinn bann croyant.—Actes 17:23, 34.
5 Nou aussi pareil, kan nou observé, sa aide nou pou koné ki interesse enn dimoune ek lerla nou pou kapav adapté nou presentation avek li. Servi bann question ki kapav encourage enn dimoune pou exprime li-mem. Pense bann verset la Bible ki nou kapav servi pou augmente so l’interet. (Prov. 20:5) Kan nou observé ek kan nou montré enn l’interet sincere envers bann dimoune, sa pou aide nou pou partage la bonne nouvelle dan enn fason efficace.