Aide enn dimoune pou raisonné
1. Ki pli bon fason nou kapav aborde enn dimoune dan nou ministere?
1 Ki pli bon fason nou kapav aborde enn dimoune dan ministere—kan nou categorik ou-soit kan nou aide enn dimoune pou raisonné ek tire bann bon conclusion? L’apotre Paul ti raisonne avek bann Juif dan Thessalonique, ek “lerla, certain parmi zot ti vinn croyant.” (Actes 17:2-4) Ki nou bizin faire kan nou raisonne avek lezot?
2. Couma nou kapav imite l’exemple Paul kan nou partage la bonne nouvelle?
2 Prend en consideration zot sentiment ek zot culture: Pou aide bann dimoune dan nou territoire pou raisonné, nou bizin prend en consideration zot sentiment. Paul ti faire enn discours avek bann Grec ki pa ti croyant dan l’Aréopage. Dan commencement sa discours-la, li ti mentionne bann kitsoz ki kitfois zot ti koné ek accepté. (Actes 17:22-31) Alors, kan ou prepare ou presentation, prend en consideration bann croyance ek bann prejugé ki bann dimoune ena dan ou territoire. (1 Cor. 9:19-22) Si enn dimoune souleve enn l’objection, essaye rod bann sujet conversation lor ki ou ek dimoune-la d’accord ek contigne ou conversation lor la.
3. Couma nou kapav raisonne pli bien avek lezot, kan nou servi bann question dan enn fason efficace?
3 Servi bann question dan enn fason efficace: Nou pa kapav explik enn voyageur kot li bizin passé pou arrive dan enn l’endroit, a moins nou koné kot-sa voyageur-la été. Li pareil, nou pa kapav aide enn dimoune pou tire enn bon conclusion, a moins ki nou konn so l’opinion. Avant ki li ti raisonne avek enn kikenn ki ti pé ecoute li, souvent Jésus ti pose bann question pou li koné ki dimoune-la pensé. Par exemple, kan enn dimoune ti demann Jésus: “Ki mo bizin faire pou mo gagne la vie pou touletan?,” Jésus ti rod konn seki dimoune-la pensé avant li reponn. (Luc 10:25-28) Dan enn lot l’occasion, kan Pierre ti donne enn mauvais reponse, dan enn fason efficace Jésus ti servi bann question pou corrige so fason pensée. (Mat. 17:24-26) Alors, si enn dimoune pose enn question ou-soit dire enn kitsoz ki fausse, nou kapav servi bann question pou aide li pou raisonné.
4. Kifer nou bizin essaye aide enn dimoune pou raisonné?
4 Kan nou aide enn dimoune pou raisonné, nou imite Jésus, nou Grand Enseignant, ek aussi bann lezot proclamateur ki ti efficace dan premier siecle. Nou aide dimoune-la pou garde so dignité ek nou montré li respé. (1 Pierre 3:15) Grace a sa, li pou pli disposé pou permette nou retourné.