Amelior Nou Bann Kapasite dan Nou Minister—Sirmont Bann Obzeksion

Kifer Li Inportan: Fer koumadir to kone ki enn katastrof natirel pe vini. Bann dimounn pou mor si zot pa rod enn plas pou kasiet. To al kot to vwazin pou averti li, me li koup to konversasion ek li dir twa li okipe. Se sir ki to pa pou bes lebra enn sel kout. To pou fer tou seki to kapav pou ed li, pa vre? Dan nou teritwar, boukou refiz pou ekout nou. Zot pa realize ki sa mesaz ki nou ena pou zot la, kapav sap zot lavi. Kitfwa ler ki nou pe pase, zot lespri okipe ar boukou lezot kitsoz. (Mat. 24:37-39) Li posib osi ki sertin fini ziz nou avan akoz bann fos rimer ki zot finn tande lor nou. (Mat. 11:18, 19) Sirman zot panse ki pena okenn diferans ant nou ek bann relizion ki pratik bann move kitsoz. (2 Pierre 2:1, 2) Ki to pou fer si, kouma to koumans koz avek enn dimounn, li dir twa li pa interese ar to mesaz? Fode pa to dekouraze.

Kouma To Kapav Fer Sa:

Avan ki to al prese lakaz-lakaz, pran de-trwa minit pou reflesi lor bann obzeksion ki to kapav gagne ek kouma to kapav sirmont sa bann obzeksion-la.
Si dimounn-la soulev enn obzeksion, avek takt, esey kontign to konversasion. Kitfwa to kapav felisit li. Par exanp, si li dir twa ki li ena so prop relizion, to kapav dir li: “Mo bien kontan mo’nn zwenn enn dimounn kouma ou ki interese ar bann kitsoz relizie.” Bien souvan, si to dir dimounn-la ki to konpran so santiman ek so sitiasion, sa kapav donn twa lokazion pou kontign to konversasion. Si par exanp, li dir twa ki li okipe, to kapav dir li: “Mo konpran. Me mo ti pou kontan kit sa avek ou avan mo ale.” Si li dir twa ki li pa interese, enn lot kitsoz ki to kapav fer se poz li enn kestion. Kitfwa to kapav demann li: “Eski ou pe rod dir ki ou pa interese ar Labib, ouswa se avek bann relizion an zeneral ki ou pa interese?”
Servi to bon zizman. Rapel ki Jéhovah pa fors personn pou ekout Li. (Deut. 30:19) Sakenn bizin asim so prop responsabilite devan Jéhovah. (Gal. 6:5) Si dimounn-la insiste, li pli bon ki nou ale. Kan nou respekte so santiman, kitfwa sa pou les laport ouver pou enn prosin konversasion dan lavenir.—1 Pierre 3:15.

Pandan Sa Mwa-la, Esey Sa:

Kan to zwenn enn dimounn ki’nn soulev enn obzeksion, deswit kouma to fini kit li, demann sa proklamater ki avek twa la ki meyer fason to ti kapav sirmont sa obzeksion-la.