Amelior Nou Bann Kapasite dan Nou Minister—Kan Nou Zwenn enn Dimounn Ki Ankoler

Kifer Li Inportan: Boukou dimounn ki nou zwenn dan nou minister ena bon manier. Me selman, Zezi ti anonse ki sertin dimounn pou ayir nou. (Zan 17:14) Alor, fode pa nou soke si dan nou minister nou zwenn enn dimounn ankoler. Kan sa arive, nou anvi azir dan enn fason ki pou fer plezir sa kikenn ki nou reprezante la, Zeova. (Rom. 12:17-21; 1 Pier 3:15) Kan nou fer sa, sa kapav anpes sitiasion-la vinn pli grav. Sa pou osi rann enn bon temwaniaz sa dimounn-la ek bann ki pe gete. Ek prosenn fwa, kan bann Temwin Zeova pase, kitfwa zot pou pli dispoze pou ekoute.—2 Kor. 6:3.

Kouma Nou Kapav Fer Sa:

Res kalm ek amikal. Sa pou ede pou detann latmosfer. Pa panse ki se kont ou personelman ki sa dimounn-la ankoler. (Ekle. 7:9) Kitfwa li ankoler akoz bann problem personel ouswa parski ou’nn tap so laport dan enn move ler. Ek mem si li ankoler akoz nou mesaz, souvan se parski lezot finn anbet li.—2 Kor. 4:4.
Reponn avek bann parol zanti ek ki fer plezir pou tande. (Prov. 15:1) Eski ou’nn kas so somey ouswa ou’nn deranz li? Mem si nou pa exkiz nou pou travay ki nou pe fer, avek imilite ou kapav exkiz ou si ou’nn tap so laport dan enn move ler. Eski li ankoler parski li’nn tann enn fos rimer lor nou? Si wi, kitfwa ou kapav dir li: “Mo konpran kifer sa agas ou. Selman, li paret ki seki ou’nn tande lor nou li pa exakt. Eski mo kapav explik ou?” Eski li pa dakor ar enn nou bann krwayans, kouma par exanp exkli bann dimounn ouswa lor disan? Ou kapav dir li: “Mo konpran ou. Ena lezot ankor ki’nn soulev sa kestion-la. Me eski mo kapav montre ou lor ki prinsip Labib sa lansegnman-la baze?”
Si dimounn-la bien ankoler, vomie ou ale san esey reponn li. Si li pa anvi ki bann Temwin Zeova revinn kot li, ou kapav rasir li ki nou pou respekte so desizion.

Pandan Sa Mwa-la, Esey Sa:

Fer bann model demonstrasion dan ou ladorasion an fami.
Apre ki ou’nn kit enn dimounn ki ankoler, demann proklamater ki avek ou la kouma ou ti pou kapav azir dan enn fason pli efikas.