Montré enn l’interet sincere—Kan nou souple
1 Touletan, l’apotre Paul ti adapté maniere ki li ti presente la bonne nouvelle, dapré culture ek mentalité bann dimoune ki ti pé ecoute li. (1 Cor. 9:19-23) Li finn laisse enn bon l’exemple, ek nou bizin faire tou nou possible pou faire pareil couma li. Si nou prend la peine reflechi enn tipé avant, nou kapav servi bann model presentation ki ena dan Ministère du Royaume ek adapté zot dapré besoin bann dimoune dan nou territoire. Kan nou pé approche ar enn lakaz, nou kapav remark bann kitsoz ki donne nou enn l’idée lor seki interesse dimoune ki reste ladan-la, ek nou kapav aussi koz lor sa dan nou presentation. Mais, ena encore enn lot fason ki nou kapav montré-nou souple dan predication.
2 Adapté nou presentation ar seki dimoune-la dire: Kan nou pé presente la bonne nouvelle, souvent nou pose bann dimoune enn question ek nou invite zot pou reponn. Couma eski ou considere zot reponse? Eski ou ena tendance pou zis faire zot comprend ki ou’nn tann seki zot inn dire, ek apré contigne avek presentation ki ou’nn preparé? Ou-soit eski ou montré ki ou pé prend compte seki zot inn dire ou? Si ou montré enn l’interet sincere dan seki lezot dire, kitfois ou pou kapav pose zot lezot question ki pa pou embarrasse zot ek ki pou permette ou koné seki ena vrai-mem dan zot l’esprit. (Prov. 20:5) Coumsa ou kapav attire l’attention lor bann l’aspect nou message ki pli adapté ar seki interesse sa dimoune avek ki ou pé kozé-la.
3 Sa vedir ki nou bizin disposé pou koz lor enn lot sujet apart seki nou’nn fini preparé pou kozé. Si nou commence par enn remark lor enn problem ki mentionné dan l’information, mais dimoune-la, li raconte nou enn problem ki’nn arrivé dan so l’endroit ou-soit enn kitsoz personnel, sa l’interet sincere ki nou ena pou aide li-la, bizin pousse nou pou tourne nou conversation biblik autour sujet ki interesse li plus.—Phil. 2:4.
4 Adapté nou ar seki dimoune-la bizin: Kan dimoune-la pose enn question, kitfois li pou pli bon pou contigne conversation-la enn prochaine fois, apré ki nou finn al faire bann recherche lor sa sujet-la. Nou kapav aussi offert li enn publication ki pou permette li konn plus lor sa sujet ki interesse li-la. Tousala montré ki nou vrai-mem interessé pou aide lezot aprann konn Jéhovah.—2 Cor. 2:17.