“Kontan Jéhovah, Zot Tu So Bann Fidel Serviter”
Nu Pu Selebre Lamor Jésus le 4 Avril
1 Detrwa lane desela, kan bann Kominis ti diriz l’Ukraine, bann lotorite ti vey bann frer depre, sirtu kan zur Mémorial ti aprose. Zot ti anvi kone kot zot pu fer sa reynion-la. Sa ti tuletan enn problem parski zot ti kone ki dat apepre Mémorial pu tonbe. Ki bann frer ti fer dan sa sityasyon-la? Dan lakaz enn ser ti ena enn lakav ki ti inonde. Zame bann lotorite pa ti pu panse ki bann dimunn ti pu reyni dan enn plas kumsa. Donk, bann frer finn ranz enn platform lao nivo delo. Li vre ki zot ti bizin asiz kabose parski plafon-la ti ba. Me malgre sa, personn pa finn deranz zot, ek la kongregasyon finn selebre Mémorial dan lazwa.
2 Nu bann frer Ukrainiens finn manifeste dan enn fason extraordiner, zot lamur pu Bondye kan avek determinasyon, zot finn obeir komannman pu selebre lamor Jésus. (Luc 22:19; 1 Jean 5:3) Ninport kan nu pe fer fas ar bann difikilte dan nu lavi, sa bann legzanp-la kapav ankuraz nu. Sa kapav donn nu determinasyon pu asiste Mémorial le 4 Avril. Kumsa nu pu montre ki nu ena mem santiman ki sa ekrivin Psaume-la, ki ti sante: “A kontan Jéhovah, zot tu so bann fidel serviter.”—Ps. 31:23.
3 Ed Lezot pu Ogmant Zot Lamur pu Bondye: Lamur pu Bondye pus nu pu invit lezot pu asiste Mémorial ansam avek nu. Sipleman Nu Minister DiRwayom Février, ankuraz nu tu pu fer enn lalis tu bann dimunn ki nu pans pu invite. Eski u pe fer enn zefor pu ale ek invit sak dimunn lor u lalis? Pran letan pu explik zot sinifikasyon sa levennman-la. Si u rapel zot, zur ek ler Mémorial, ek si li posib, u propoz pu vinn ansam avek zot, sa pu ankuraz zot pu vini.
4 Dan lasal, fer enn zefor spesyal pu akeyir bann ki finn aksepte u linvitasyon ek met zot alez. Kuma eski u kapav ed zot pu ogmant zot lamur pu Jéhovah? Montre u pre ek dispoze pu reponn zot bann kestyon. Prepar u pu propoz zot enn letid la Bib si bann sirkonstans permet u. Invit zot pu asiste nu bann reynion kongregasyon ki nu fer sak semenn. Bann ansyin sirtu, pu anvi pran kont bann Kretyin inaktif ki prezan. Zot kapav fer bann laranzman pu vizit zot. Ek zot kapav servi bann pwin ki’nn prezante dan diskur Mémorial pu ankuraz zot pu revinn aktif dan la kongregasyon.—Rom. 5:6-8.
5 Ogmant Nu Prop Lamur pu Jéhovah: Nu kapav ogmant nu lamur pu Jéhovah ek so Garson kan nu medit lor la ranson. (2 Cor. 5:14, 15) Get seki enn Temwin ki asiste Mémorial depi byin lontan dir: “Mo atann kan zur Mémorial vini. Sak lane sa levennman-la, vinn deplizanpli inportan pu mwa. Mo rapel, 20 an desela, pu lanterman mo papa, kan mo ti pe get so lekor. Se lerla ki mo finn resanti enn gran rekonesans pu la ranson. Avan lamor mo papa, sa size-la pa ti tus mwa sa kantite-la, li ti zis enn konesans. Li vre ki mo ti konn tu bann pasaz ki ti ena enn rapor avek la ranson ek mo ti kapav explik zot! Me se selman kan mo’nn fer fas ar lamor ki mo leker finn tuse ek mo finn resanti enn gran lazwa kan mo mazinn tu seki sa ranson-la pu fer pu nu.”—Jean 5:28, 29.
6 Amezir dat Mémorial pe aprose, pran letan pu prepar u leker pu sa levennman-la. (2 Chron. 19:3) Medit lor lektir la Bib spesyal, ki finn prevwar pu Mémorial, ek ki indike dan brosir Anu Egzaminn la Bib Tulezur—2004 ek Calendrier 2004. Ena sertin ki kontan reget sapit 112-116 dan liv Le plus grand homme de tous les temps, pandan zot letid familyal. Ena sertin ki fer bann resers siplemanter ek zot servi lezot piblikasyon furni par esklav fidel ek avize. (Mat. 24:45-47) Nu tu nu kapav koz lor ranson dan nu bann lapriyer sinser. (Ps. 50:14, 23) Wi, pandan lepok Mémorial, anu kontiyne medit lor lamur ki Jéhovah ena pu nu ek truv bann mwayin pu montre nu lamur pu Li.—Marc 12:30; 1 Jean 4:10.