Anu Ena Mem Latitid Ki Jésus
1. Ki latitid Jésus ti manifeste?
1 Mem si zame nu pa’nn truv Jésus, Garson Bondye, nu’nn arive kontan li atraver bann resi lor so lavi ek lor so minister. (1 Pierre 1:8) Pu akonpli volonte so papa, li’nn kit gran pozisyon ki li ti ena dan lesyel pu vinn lor later pu viv kuma enn imin. Li’nn servi so prosin san rod so prop lavantaz, ek li’nn donn so lavi pu tu dimunn. (Mat. 20:28) Parol Bondye donn nu sa lankurazman: “Gard sa latitid ki Christ Jésus ti ena-la.” Kuma eski nu kapav ena mem lespri sakrifis ki Jésus?—Phil. 2:5-8.
2. Ki sityasyon difisil buku Kretyin bizin afronte, ek ki kapav ed zot sirmont sa?
2 Kan Nu Fatige: Se vre ki Jésus ti parfe, me defwa li ti santi li fatige. Enn fwa, alor ki li ti ‘fatige par traze ki li ti fer,’ li ti donn enn Samaritenn enn temwaynaz afon. (Jean 4:6) Zordi, buku Kretyin santi zot fatige. Apre enn semenn travay, li difisil pu truv lafors pu partisip dan predikasyon. Me, si nu fer li regilyerman, nu pu truve ki la predikasyon redonn nu lafors lor plan spirityel.—Jean 4:32-34.
3. Kuma eski nu kapav imit dezir ki Jésus ti ena pu anseyne?
3 Enn lot fwa, Jésus ek so bann disip ti al dan enn plas trankil pu repoz inpe. Me enn gran laful finn kone kot zot ete, ek zot finn vinn zwenn zot. Olye ki li ankoler, Jésus “finn gayn pitye pu zot” ek li’nn “kumans anseyn zot buku kitsoz.” (Marc 6:30-34) Pu kumans ek diriz bann letid la Bib, nu bizin ena sa mem latitid-la. Sa demann buku zefor ek enn lamur sinser pu bann dimunn. Si u pa pe kondir enn letid la Bib pu le moman, kontiyn fer zefor pu rod enn.
4. Kuma eski servis pyonye oxilyer kapav ed nu pu ena mem latitid ki Christ?
4 Met Bann Kitsoz Spirityel an Premye: Servis pyonye oxilyer kapav ed nu pu konsantre plis lor bann laktivite spirityel. Enn zenn ser ti ekrir: “Apre ki so mama inn ankuraz nu pu fer pyonye oxilyer avek li pandan enn mwa, mo kamarad ek mwa inn antrepran sa servis-la. Mo byin kontan ki mo’nn fer sa. Mo finn gayn lokazyon pu konn bann frer ek ser pli byin, ek byin vit, zot finn vinn plis ki fami pu mwa. Mo kontan usi ki mo finn gayn buku lokazyon pu koz lor Jéhovah avek lezot ek anseyn zot bann verite extraordiner lor Rwayom Bondye. Tusala finn fer mwa vinn pli pros ar Jéhovah ek so lorganizasyon.”—Ps. 34:8.
5. Kifer eski nu bizin kontiyn fer zefor pu ena mem latitid ki Jésus?
5 Nu tu nu ena enn lalit pu amene: enn kote nu bizin reziste kont nu bann dezir inparfe, ek lot kote, nu bizin fer Jéhovah plezir. (Rom. 7:21-23) Lemond ankuraz bann dimunn pu pa fer zefor; me nu, nu bizin rezet sa tandans-la. (Mat. 16:22, 23) Jéhovah kapav ed nu pu reysi par mwayin so lespri sin. (Gal. 5:16, 17) Ziska ki nu rant dan lemond nuvo, anu montre mem latitid ki Jésus, kan nu met bann kitsoz spirityel an premye dan nu lavi.—Mat. 6:33; Rom. 15:1-3.