Enn Nouveau Disposition pou Faire Révision l’Assemblées

Pli allé, le monde Satan pé dégradé. À cause sa, Jéhovah fortifié nous pou nous ‘pa désobéir Li, pou nous rejette bann désirs le monde, ek pou nous vive avec enn bon jugement, avec la justice, ek avec l’attachement pou Bondié dans sa système-la.’ (Tite 2:12) Parmi bann dispositions ki Li prend par moyen so “l’esclave fidèle et avisé,” éna bann l’assemblée circonscription ek spécial enn jour ki nous assisté chaque année. (Mat. 24:45) Nous vraiment fortifié kan nous assisté sa bann rassemblements spirituel-la, pa vrai?

Pou permette nous retenir ek applique l’enseignement ki nous gagné dans sa bann l’assemblées-la, finn prévoir enn nouveau façon pou faire révision l’assemblées. Sa pou en vigueur pendant l’année service 2005. Bann l’articles lor pages 5-6 sa supplément-la donne nous enn avant-goût séki nous pou aprann dans sa bann l’assemblées-la. Éna aussi bann questions révision pou chaque l’assemblée. Bann congrégations pou kapav examine sa bann l’articles-la dans Réunion Service enn-deux semaines, avant ek après, zot bann l’assemblées. Couma pou faire sa?

Enn ou-soit deux semaines avant zot l’assemblée circonscription, la congrégation pou écoute enn discours 10 minutes dans Réunion Service, ki basé lor l’article “Nouveau Programme l’Assemblée Circonscription.” Sa pou mette nous en appétit pou programme l’assemblée. L’orateur pou attire l’attention lor bann questions révision. Li pou encourage la congrégation pou prend notes pendant l’assemblée pou zot kapav participe dans révision ki pou faire enn-deux semaines après l’assemblée.

Enn-deux semaines après l’assemblée, pou consacré 15 minutes dans Réunion Service, pou faire révision premier jour l’assemblée. La semaine après, pou consacré 15 minutes encore pou révise deuxième jour l’assemblée. C’est bann sujets discussion avec l’auditoire, basé lor bann questions ki éna dans sa supplément-la. Sa révision-la bizin faire l’auditoire surtout trouvé couma zot kapav applique séki zot finn aprann dans zot la-vie. Si nécessaire, bann anciens pou modifié zot programme Réunion Service pou faire sa bann révisions-la.

Sa disposition-la applique aussi pou l’assemblée spécial enn jour, sauf ki pou éna enn seul sujet 15 minutes pou révise programme-la en entier. Sûrement nous tou nous pou envie préserve sa supplément-la. Coumsa, nous pou kapav servi li pou bien profite bon l’enseignement ki Jéhovah donne nous.—Is. 48:17, 18.