Anou Remercié Jéhovah pou So l’Amour Fidel
Nou Pou Commemore la-Mort Christ le 24 Mars
1. Couma Jéhovah finn montré so l’amour fidel enver nou?
1 Enn ecrivain Psaume finn dir: “O, ki bann dimoune remercié Jéhovah pou so l’amour fidel ek pou so bann travail extraordinaire enver garson bann zom.” (Ps. 107:8) L’amour fidel Bondié li plus ki zis l’affection ki Li éna pou bann dimoune. Nou trouve sa bien dan sa bann parole-la: “To l’amour fidel, O Jéhovah finn contigne soutenir moi.” (Ps. 94:18) Oui, Jéhovah finn montré enn l’amour fidel extraordinaire kan Li finn offer so garson ki Li’nn crée Li tousel!—1 Jean 4:9, 10.
2. Couma nou kapav montré nou reconnaissance enver Jéhovah?
2 A mesure ki Mémorial la mort Christ kosté, couma nou kapav remercié ‘Bondié pou So l’amour fidel’? (Ps. 59:17) Sans doute, nou tou pou content pou reserve enn tipé lé-temps pou medite lor bann dernier jour ki Jésus finn vive lor la terre. (Ps. 143:5) Li pou aussi utile pou suive lecture la Bible ki’nn prevoir pou Mémorial dan nou brochure Anou Examine la Bible Toulé-Jour—2005 ek, si possible, pou lir aussi chapitre 112-116 dan livre Le plus grand homme, ek faire plus recherche dan bann lezot publication. Medite lor bann verset ki ou lir ek concentré bien lor la. (1 Tim. 4:15) Kan nou etudié Parole Bondié ek nou reflechi lor la dan nou la-priere, sa pa zis fortifié nou leker mais li aussi demontré nou l’amour pou Jéhovah.—Mat. 22:37.
3, 4. (a) Couma nou kapav imite l’attitude nou bann frere en Liberia? (b) Kisannla ou pense pou invité pou Mémorial?
3 Motive Lezot pou Remercié Bondié: L’année dernier 16,760,607 dimoune ti assisté Mémorial dan le monde entier, parmi 10,398 dan nou bann île. Éna de-trois l’année, dan enn village en Liberia, bann frere ti ecrire enn lettre le maire la-ville. Zot ti dir li ki zot éna l’intention pou celebré Repas du Soir dan so la-ville. Le maire ti donne zot permission pou servi enn terrain football pou sa l’occasion-la. Et li ti faire en sorte ki faire enn annonce partout dan l’endroit pou invite tou bann dimoune pou assisté sa l’evenement-la. Mem si ti éna zis cinq proclamateur dan sa village-la, ti éna 636 assistant pou Mémorial!
4 Nou aussi nou envi aide maximum dimoune pou joinde avek nou pou celebré Mémorial. Kifer ou pa faire enn la-liste bann dimoune ki ou envi invité? Lor dernier page Réveillez-vous ! 8 Mars ek La Tour de Garde 15 Mars, nou trouve enn l’invitation pou Mémorial. Ou kapav servi aussi bann feuille l’invitation ki’nn imprimé pou Mémorial. Tape l’heure ek place kot pou faire sa celebration-la lor feuille l’invitation, ou-soit ecrire li bien prop ek laisse enn avek chaque dimoune ki ou invité. Kan le 24 Mars pé kosté, al re-visite chaque dimoune-la pou rappel zot ek pou faire bann dernier l’arrangement necessaire.
5. Couma nou kapav encourage bann ki etudié la Bible pou assisté Mémorial?
5 Couma nou kapav aide bann etudiant la Bible ki pankor commence assisté reunion, pou zot kapav profite sa l’evenement-la? Nou prend dé-trois minute pendant chaque l’etude pou aide zot comprend l’importance sa celebration-la. Ou pou trouve bann bon l’idée dan La Tour de Garde 15 Mars, 2004, page 3-7, ek livre Comment raisonner page 241-5.
6. Kifer li important ki nou accueillir bann invité pendant Mémorial?
6 Accueillir Bann Invité: Pendant Mémorial, al ver bann nouveau ek souhaite zot la bienvenue. (Rom. 12:13) Prend bann disposition pou assize kot bann ki ou’nn invité, ek assure ou ki zot éna enn la-Bible ek enn livre cantik. Nou pou surtout envi al ver bann frere ek soeur inactif ki’nn faire zeffort pou vini ek accueillir zot. L’amour sincere ki nou manifesté enver zot, kapav aide zot pou recommence frequente regulierement la congregation. (Luc 15:3-7) Pou sa l’occasion bien sacré-la, anou faire tou séki nou kapav pou encourage lezot pou joinde ensam avek nou pou remercié Jéhovah, pou So ‘l’amour fidel ki extraordinaire.’—Ps. 31:21.