Program familial—Texte du jour
1 Chaque jour, bann parent ki content zot zenfant, faire bann grand zeffort pou donne zot enn bon nourriture. Mais li encore pli important ki zot donne zot zenfant nourriture spirituel ki sorti dan Parole Bondié. (Mat. 4:4) Enn fason ki ou kapav aide ou zenfant pou developpe enn bon l’appetit spirituel ek pou “grandi ek gagne la vie,” c’est kan ou prend le temps toulé-jour pou examine texte du jour en famille. (1 Pierre 2:2) Kan eski ou kapav faire texte du jour?
2 Pendant bann repas: Si ou commence la-journée avek l’examen texte du jour, sa kapav aide ou famille pou rappel Jéhovah toute la journée. (Ps. 16:8) Enn mama ti decide pou lire ek pou discute texte du jour avek so garson pendant ki li prend so ti-dejeuner, ek faire la priere ensam avek li avant li al lekol. Sa ti aide garson-la pou reste ferme kan li ti bizin faire face ar bann kitsoz couma nationalisme, kan li ti bizin resisté kont bann tentation immoral, ek pou li gagne courage pou donne temoignage ar so bann camarade ek so bann professeur. Mem si pa ti ena lezot Témoin dan lekol, jamais li pa ti senti-li tousel.
3 Si li pa possible pou faire texte du jour gramatin, kitfois ou kapav discute li en famille pli tard, kitfois a-soir kan pé mangé. Certain raconte bann experience ki zot finn faire dan predication, ou-soit zot partage bann point interessant ki zot finn trouvé dan zot lecture la Bible personnel. Beaucoup rappel sa bann moment-la avek plaisir couma bann moment pli heureux ki zot inn passé en famille.
4 A-soir: Pou certain famille, meilleur moment pou discute texte du jour c’est a-soir avant zot al dormi. Sa li aussi enn bon l’occasion pou prié ensam. Kan ou bann zenfant ecoute ou koz lor Jéhovah toulé-jour ek prié Li, Jéhovah vinn enn kikenn ki réel pou zot.
5 Nou souhaité ki Jéhovah beni ou bann zeffort pou faire la verité rente dan leker ou bann zenfant, kan ou servi brochure Anou Examine la Bible Toulé-Jours.