NOU LAVI KRETIEN

Eski To Pe Tir Profi ar Brosir Anou Examinn Labib Toulezour?

Eski lir brosir Anou Examinn Labib Toulezour form parti bann kitsoz ki to fer toulezour pou vinn pli pros ar Zeova? Si to pa pe fer li, eski to kapav koumans fer li? Boukou dimounn kontan fer li gramatin boner pou ki zot kapav kontign reflesi lor la pandan lazourne. (Zo 1:8; Ps 119:97) Kouma eski to kapav tir plis profi ar text Labib ki ena pou sak zour? Lir bann verse ki ena avan ek apre verse-la pou bien konpran so kontex. Pans lor enn zistwar Biblik ki montre prinsip lor ki text-la koze. Apre sa, aplik prinsip-la dan to lavi. Kan Parol Bondie inflians to bann desizion, li pou gid twa dan to lavi ek vremem to pou gagn bann bienfe.—Ps 119:105.

Bann fami Betel dan lemond antie examinn brosir Anou Examinn Labib Toulezour kan zot pran zot ti dezene. Sa bann dernie lane la, finn met boukou sa bann diskour-la lor Progam Televizion JW^® dan kategori LEVENNMAN EK DISKOUR. Kan dernie fwa to’nn get enn sa bann diskour-la? Kitfwa sertin ladan koz exakteman lor seki to bizin. Par exanp, kouma zistwar Lot kapav inflians to bann desizion?

GET VIDEO PA KONTAN LEMOND (1 ZAN 2:15), EK APRE SA, REPONN SA BANN KESTION-LA:

Lor ki prinsip Labib sa ladorasion dan gramatin la ti baze?
Kouma zistwar Lot montre danze ki ena kan nou kontan lemond ouswa bann kitsoz ki ena dan lemond?—Ze 13:12; 14:12; 19:3, 12, 13, 24-26
Kouma nou kapav montre ki nou kontan Zeova ek pa lemond ouswa bann kitsoz ki ena dan lemond?

Enn frer pe reflesi lor text pou zordi ek so komanter toutlong lazourne. 1. Pandan ki li pe lir, li pe mazinn senn kot bann anz pe trap Lot ek so fami par lame pou fer zot sove depi Sodom. 2. Pandan ki li pe dezene dan travay, li pe kontign reflesi lor seki li’nn lir gramatin. 3. Tanto kot li, li pe kontign medit lor seki li’nn lir gramatin pandan ki li pe pliy so linz. — Kouma mo kapav montre pandan lazourne ki Parol Zeova ena valer pou mwa