Enn temoignage sans okenn parole
1 Sans okenn parole, creation Jéhovah donne nou beaucoup renseignement lor So bann qualité invisible. (Ps. 19:1-3; Rom. 1:20) Li pareil, nou bon conduite, nou bann qualité chrétien ek nou l’apparence modeste donne enn temoignage, sans okenn parole. (1 Pierre 2:12; 3:1-4) Nou tou nou bizin ena desir pou “faire l’enseignement nou Sauveur, Bondié, parette pli joli dan tou kitsoz,” grace a nou conduite.—Tite 2:10.
2 Couma eski bann dimoune imparfait kapav faire bann l’enseignement la Bible parette pli attirant? Li possible zis si zot laisse Parole Bondié guide zot ek zot laisse l’esprit saint influence zot la-vie. (Ps. 119:105; 143:10) Parole Bondié, “li vivant ek li puissant, li pli fité ki enn l’epée ki coupe deux coté.” (Héb. 4:12) Li rente dan pli profond nou-mem ek li permette nou mette nouveau personnalité lor nou. (Col. 3:9, 10) L’esprit saint permette nou developpe bann bon qualité couma la bonté, l’humilité, ek la maitrise de soi. (Gal. 5:22, 23) Eski sakenn parmi nou pé laisse Parole Bondié ek l’esprit saint influence nou la-vie?—Éph. 4:30; 1 Thess. 2:13.
3 Lezot remarké: Kan nou vive dapré bann principe ki Jéhovah finn etabli ek nou faire tou pou reflete So bann qualité, lezot remarké. Guette, par exemple, cas sa missié-la: So bann collegue travail ti bouffonne li parski li ti courte. Mais enn soeur ki ti travail dan mem bureau, ti touletan traite li avek respé ek dignité. Sa finn pousse li pou demann sa soeur-la kifer li pa ti faire pareil couma lezot. Soeur-la finn explik li, ki si li ena enn tel conduite c’est grace a bann principe la Bible ki li mette en pratik dan so la-vie. Li finn aussi partage avek missié-la l’esperance extraordinaire lor Royaume Bondié. Missié-la finn commence etudié la Bible ek apré li finn progressé ek li finn baptisé. Kan li’nn retourne dan so pays, so bann famille finn bien impressioné par so bon conduite, ek plusieurs parmi zot finn accepté la verité.
4 Ki li dan travail, dan lekol, ou-soit dan nou relation avek bann famille ek bann voisin, grace a nou bon conduite, ek aussi nou temoignage, nou kapav pousse lezot pou donne Bondié la gloire.—Mat. 5:16.