Seki nou pé accompli grace a nou ministere
1. Couma Jéhovah considere nou ministere, ek ki reaction bann dimoune ena?
1 Parole Bondié decrire bann chrétien ki pé servi Jéhovah, couma bann dimoune ki pé marche dan enn procession kot zot pé celebré enn la-victoire. (2 Cor. 2:14-16) Kan nou faire bann dimoune gagne connaissance lor Bondié, nou ministere li couma enn l’encens agreable devant Jéhovah. Ena dimoune ki attiré avek la bonne nouvelle; lezot rejette li. Mais reaction defavorable la majorité pa vedir ki nou travail pa pé reussi. Anou guetté seki nou ministere pé accompli.
2. Ki nou ministere permette nou montré?
2 Donne Jéhovah la gloire: Satan pretann ki bann serviteur Jéhovah pé servi Li pou bann raison egoïste. (Job 1:9-11) Nou ministere donne nou enn l’occasion pou montré ki nou l’adoration pou Bondié li sincere. Beaucoup proclamateur contigne obeir l’ordre pou preché ek faire bann disciple, malgré zot situation difficile ou-soit l’indifference bann dimoune en general. Leker Jéhovah content, kan so bann serviteur enduré avek fidelité coumsa!—Prov. 27:11.
3. Kifer li bien important ki nou contigne faire konn nom Bondié ek so bann projet?
3 En plus, nou ministere ena enn role dan realisation bann projet Bondié. En rapport avek destruction le monde Satan, ki pré pou vini, Jéhovah dire: “Bann nation pou bizin koné ki mo-mem Jéhovah.” (Ézék. 39:7) Pou ki bann nation konn sa, li bien important ki bann serviteur Bondié contigne annonce so nom ek so projet “ar tou nation, tribu, langue ek peuple.”—Rév. 14:6, 7.
4. Couma la predication servi couma enn base lor ki pou faire jugement?
4 Enn base lor ki pou faire jugement: Predication la bonne nouvelle servi aussi couma enn base pou Bondié juge bann dimoune. L’apotre Paul ti dire ki Jésus Christ pou tire vengeance lor “bann ki pa konn Bondié ek lor bann ki pa obeir la bonne nouvelle concernant nou Seigneur Jésus.” (2 Thess. 1:8, 9) Bann dimoune pou jugé dapré zot reaction ar la bonne nouvelle. Bann serviteur Bondié ena vrai-mem enn grand responsabilité! Pou evité ki ena enn dette di-sang lor nou la-tête, nou bizin pa hesité pou faire konn message lor royaume Bondié, enn message ki faire gagne la vie.—Actes 20:26, 27.
5. Couma nou ministere reflete misericorde Bondié?
5 Jéhovah montré so misericorde par bann zeffort ki nou faire pou aide bann dimoune gagne so faveur. (1 Tim. 2:3, 4) Nou koné ki la vie bann dimoune touletan pé changé, alors nou contigne al visite zot pou encourage zot pou rod Jéhovah pendant ki ena encore le temps. Kan nou faire sa, nou pé reflete “compassion nou Bondié,” ki “pa envie ki personne detruire mais Li envie ki tou dimoune repenti.”—Luc 1:78; 2 Pierre 3:9.
6. Ki bienfait nou gagné kan nou reste occupé dan service pou Jéhovah?
6 Bienfait ki nou gagné: Li enn protection pou nou kan nou reste occupé dan service Jéhovah. Sa aide nou pou contigne ‘garde presence jour Jéhovah touletan dan nou l’esprit,’ ek pou pa laisse sa mauvais lé-monde-la faire nou vinn impur. (2 Pierre 3:11-14; Tite 2:11, 12) Alors, anou reste “ferme, solid, ena toujours beaucoup pou faire dan travail nou Seigneur,” parski nou koné ki bann zeffort ki nou faire dan nou ministere chrétien, zot pa dan vide.—1 Cor. 15:58.