Montré enn l’interet sincere—Kan nou pose question ek kan nou ecouté
1 La plupart dimoune content dire seki zot pensé, mais zot pa content kan faire enn sermon ou-soit enn l’enquete avek zot. Alors, en tant ki bann ministre chrétien, nou bizin aprann couma pose bann dimoune question pou faire zot dire seki ki zot pensé.—Prov. 20:5.
2 Nou bann question bizin encourage zot pou reflechi, pa embarrasse zot. Kan li preché, enn frere demandé, “Eski ou pensé pou kapav ena enn lepok kot bann dimoune pou traite zot camarade avek dignité ek respé?” Dependant seki dimoune-la reponn, li contigné, “Ki ou pensé bizin pou reussi faire sa?” ou-soit “Kifer ou pense coumsa?” Kan enn lot frere donne temoignage informel ek kan li preche dan bann place publik, li dire bann ki ena zenfant, “Ki kitsoz ou pli apprecié dan ou role en tant ki parent?” Apré li demandé, “Ki kitsoz pli tracasse ou?” Remarké ki sa bann question-la permette bann dimoune dire seki zot pensé sans ki sa embarrasse zot. Parski tou situation pa pareil, kitfois nou bizin adapté nou sujet ek aussi fason ki nou pose question kan nou pé koz avek bann dimoune dan nou territoire.
3 Faire bann dimoune dire seki zot pensé: Si bann dimoune disposé pou dire ou seki zot pensé, ecoute zot avek patience sans coupe zot pou nanyin. (Jacq. 1:19) Prend compte seki zot dire. (Col. 4:6) Ou kapav zis dire, “Li interessant seki ou’nn dire. Merci ou’nn dire moi seki ou pensé.” Felicite zot si ou kapav faire sa sincerement. Pose lezot question dan enn bon fason pou konn seki zot pensé ek kifer zot pense coumsa. Rod bann sujet conversation kot ou ek dimoune-la d’accord. Si ou envie attire zot l’attention lor enn verset la Bible, ou kapav dire, “Eski ou’nn deja considere sa point-la?” Evite montré-ou trop categorik, ek pa rente dan bann grand debat.—2 Tim. 2:24, 25.
4 Fason ki nou ecouté pou determine fason ki lezot reponn nou bann question. Bann dimoune kapav koné si nou pé ecoute zot avek tou nou leker. Enn surveillant itinerant ti dire, “Kan ou montré bann dimoune ki ou disposé pou ecoute zot, li etonnant couma sa kapav attire zot, ek sa montré ziska ki point ou interessé personnellement avek zot.” Kan nou ecoute lezot, nou donne zot l’honneur, ek sa kapav pousse zot pou ecoute sa bon nouvel ki nou envie partagé-la.—Rom. 12:10.