Watchtower BIBLIOTEK LOR INTERNET
Watchtower
BIBLIOTEK LOR INTERNET
Kreol Morisien
  • LABIB
  • PIBLIKASION
  • RENION
  • km 8/10 p. 3-6
  • Ou kapav rann temoignage informel!

Pena video ki disponib pou seki ou finn swazir.

Sori, enn erer inn anpes sa video-la zwe.

  • Ou kapav rann temoignage informel!
  • Ministere du Royaume—2010
  • Lor Mem Size
  • Eski ou’nn paré pou rann temoignage informel?
    Ministere du Royaume—2009
  • Donn Zeova Loner par Temwaynaz Okazyonel
    Ministere du Royaume—2003
  • Nou bann Témoins 24 heure lor 24
    Ministere du Royaume—2009
  • Anou “rann temoignage a fond” avek zele
    Ministere du Royaume—2008
Rod Plis
Ministere du Royaume—2010
km 8/10 p. 3-6

Ou kapav rann temoignage informel!

1. (a) Ki été temoignage informel? (b) Comié dimoune dan l’assistance inn konn la verité pou premier fois a travers temoignage informel?

1 Dan ou congregation, comié dimoune inn konn la verité premier fois a travers temoignage informel? Kitfois ou pou etonné par reponse sa question-la. Temoignage informel implik partage la bonne nouvelle avek bann dimoune dan nou bann activité toulé-jour—kan nou voyagé, visite bann famille ou-soit bann voisin, faire shopping, dan lekol, dan travail ek dan beaucoup lezot l’occasion. Dan enn groupe kot ti ena plus ki 200 dimoune ki’nn prend bapteme, 40% ladan inn konn la verité a travers temoignage informel! Alors, sa methode pou preché-la, li bien efficace.

2. Ki bann l’exemple temoignage informel nou trouvé dan la Bible?

2 Dan premier siecle, souvent bann evangelisateur ti donne temoignage informel. Par exemple, kan Jésus ti pé traverse Samarie, li ti rann temoignage ar enn madame ki ti pé puise de l’eau kot la fontaine Jacob. (Jean 4:6-26) Philippe ti commence enn conversation avek enn fonctionnaire éthiopien, ki ti pé lire livre Isaïe. Philippe ti demann-li: “Eski vrai-mem to comprend seki to pé lire?” (Actes 8:26-38) Kan l’apotre Paul ti dan prison dan la ville Philippes, li ti rann temoignage avek enn gardien prison. (Actes 16:23-34) Plitar, kan ki li ti prisonnier dan enn lakaz, Paul “ti accueil avek bonté tou bann ki ti vinn kot li, sans ki nanyin empeche li, li ti preche Royaume Bondié ar zot ek ti enseigne zot bann kitsoz concernant nou seigneur Jésus Christ.” (Actes 28:30, 31) Ou aussi ou kapav donne temoignage informel, mem si ou timide. Couma?

3. Ki kapav aide nou pou surmonte nou timidité?

3 Couma pou commencé: Beaucoup parmi nou trouve sa difficile pou commence enn conversation avek enn dimoune ki nou pa koné. Mem si nou konn bann dimoune ki pa Témoins, nou kapav senti-nou mal a l’aise pou commence koz lor la verité. Mais, si nou medite lor bonté Jéhovah, lor bann tresor spirituel ki Li’nn donne so bann serviteur, ek lor condition difficile bann dimoune dan le monde, sa pou motive nou pou kozé. (Yona 4:11; Ps. 40:5; Mat. 13:52) En plus, nou kapav demann Jéhovah aide nou pou “prend beaucoup courage.” (1 Thess. 2:2) Enn zeleve Guiléad ti dire: “Souvent mo’nn trouvé ki la priere aide moi kan mo trouve sa difficile pou koz avek bann dimoune.” Si ou hesité pou kozé, faire enn ti la priere en silence dan ou leker.—Neh. 2:4.

4. Ki l’objectif nou kapav fixé nou, ek kifer?

4 Temoignage informel. Pareil couma nom-la faire nou comprend, pou rann temoignage informel li pa necessaire ki nou commence nou conversation avek enn l’introduction ou-soit enn verset la Bible. Sa kapav aide nou si nou ena zis l’objectif pou commence enn conversation sans ki nou senti-nou obligé pou rann temoignage desuite. Beaucoup proclamateur dire ki kan zot faire sa premier pas-la, sa donne zot plus l’assurance pou partage la bonne nouvelle par la suite. Si dimoune-la pa envie kozé, pa bizin oblige li. Avek gentillesse, arrete sa conversation-la ek koz lor lot kitsoz.

5. Ki finn aide enn soeur ki timide pou donne temoignage informel?

5 Pendant ki li pé acheté bann kitsoz dan bazar, enn soeur ki timide guette dimoune-la avant ek faire enn sourire amical. Si dimoune faire enn sourire ar li aussi, li faire enn ti remark. Si reaction dimoune-la positif, sa donne li confiance pou contigne so conversation. Li ecoute bien ek essaye discerné ki l’aspect la bonne nouvelle kapav interesse dimoune-la. Kan li’nn servi sa methode-la, li’nn kapav offert beaucoup publication ek mem commence enn l’etude la Bible.

6. Couma nou kapav commence enn conversation dan enn fason informel?

6 Commence bann conversation: Ki nou kapav dire pou commence enn conversation? Kan Jésus ti koz avek enn madame kot enn puit, li ti simplement commence so conversation kan li ti demann madame-la donne li boire. (Jean 4:7) Alors, kitfois nou kapav commence enn conversation kan nou dire dimoune-la enn bonjour amical ou-soit nou pose li enn question. Pendant ki nou pé kozé nou kapav trouve enn l’occasion pou mentionne enn pensé la Bible ek kitfois nou kapav plante enn la grain verité. (Eccl. 11:6) Ena inn reussi kan zot inn dire enn kitsoz interessant ki faire dimoune-la envie konn plus ek pose bann question. Par exemple, pendant ki ou pé attann kot docteur, ou kapav commence en conversation kan ou dire: “Mo pou bien content kan mo pou nepli malade.”

7. Kan nou observé bien, couma sa pou aide nou pou rann temoignage informel?

7 Kan nou observe bien, sa kapav aide nou pou commence bann conversation. Si nou remark enn parent ki ena bann zenfant ki ena bon maniere, nou kapav felicite parent-la, ek demann-li: “Ki finn aide ou pou vinn enn bon parent?” Enn soeur note bann sujet lor ki so bann collegue kozé dan travail ek apré li partage enn l’information specifik lor sujet ki interesse so bann collegue. Kan li’nn aprann ki enn madame dan so travail pé pense pou marié, li’nn donne madame-la enn Réveillez-vous ! ki ti koz lor couma organise enn mariage. Sa finn permette li gagne lezot conversation biblik par la suite.

8. Couma nou kapav servi nou bann publication pou commence bann conversation?

8 Enn lot fason pou commence bann conversation c’est kan nou lire enn parmi nou bann publication dan enn place kot lezot kapav trouve nou. Enn frere ouvert enn La Tour de Garde ou-soit enn Réveillez-vous ! ki ena enn titre interessant ek li commence lire li doucement. Si li remarké ki kikenn ki pré ar li pé guette so magazine, li pose enn question ou-soit li faire enn ti remark lor lartik-la. Souvent sa tourne lor enn conversation ek enn temoignage. Si nou zis kit enn nou bann publication dan enn place kot dimoune pou trouvé, sa kapav faire bann collegue travail ou-soit bann camarade lekol envie konn plus ek sa kapav pousse zot pou pose question lor la.

9, 10. (a) Couma nou kapav crée bann l’occasion pou donne temoignage informel? (b) Couma ou’nn reussi faire sa?

9 Crée bann l’occasion: Parski travail predication li urgent, nou pa kapav donne temoignage informel zis kan l’occasion presenté. Au contraire, nou bizin faire zeffort pou crée bann l’occasion pou rann temoignage dan nou bann l’activité toulé-jour. Fini calculé ki bann dimoune nou pou joinde ek couma nou kapav commence enn conversation amical. Garde enn la bible ek aussi deux-trois publication avek nou, pou ki nou kapav rann temoignage avek bann dimoune ki montré l’interet.—1 Pierre 3:15.

10 Beaucoup proclamateur inn trouve bann fason pou crée bann l’occasion pou donne temoignage informel, kan zot inn servi zot l’imagination. Enn soeur ki vive dan enn appartement ki bien protegé par enn systeme securité, servi enn l’endroit dan batiment-la, kot bann dimoune kapav detann-zot, pou faire bann puzzle ki montré bann joli zimage la nature. Kan bann dimoune arreté ek koz avek li lor sa joli zimage-la, li profite l’occasion pou commence enn conversation ek dire zot promesse ki la Bible faire concernant “enn nouveau le ciel ek enn nouveau la terre.” (Rév. 21:1-4) Eski ou kapav reflechi lor couma ou kapav crée bann l’occasion pou donne temoignage informel?

11. Couma nou kapav suive l’interet kan nou donne temoignage informel?

11 Suive l’interet: Si ou joinde enn dimoune ki ecoute ou, essaye suive l’interet. Si li approprié, ou kapav dire dimoune-la: “Mo bien content mo’nn koz avek ou. Kot-sa mo kapav joinde ou pou nou kozé encore?” Certain proclamateur inn donne zot l’adresse ek numero telephone dimoune-la ek dire: “Mo’nn bien apprecié nou conversation. Si ou ti pou content konn plus lor seki nou’nn kozé, ou kapav contacté moi.” Si ou pa kapav suive l’interet dimoune-la ou-mem, faire bann l’arrangement avek congregation ki concerné kan ou remette enn forme Veuillez suivre l’intérêt (S-43) ar secretaire ou congregation.

12. (a) Kifer nou bizin note quantité l’heure ki nou passé pou donne temoignage informel ek mette sa lor nou rapport? (b) Ki resultat nou finn gagné a travers temoignage informel? (Guette l’encadré “Gagne bann bon resultat a travers temoignage informel!”)

12 Nou bizin mette lor nou rapport l’heure ki nou passé pou donne temoignage informel. Alors, faire sur ki ou note sa, mem si li zis deux-trois minute par jour. Reflechi lor la: si chaque proclamateur donne temoignage informel pendant 5 minute chaque jour, sa pou faire enn total plus ki 17 million l’heure chaque mois!

13. Ki bizin motive nou pou donne temoignage informel?

13 Nou ena bann pli bon raison ki ena pou donne temoignage informel—l’amour pou Jéhovah ek nou prochain. (Mat. 22:37-39) C’est nou grand reconnaissance pou bann qualité Jéhovah ek so projet ki pousse nou pou koz lor “la gloire beauté so royauté.” (Ps. 145:7, 10-12) Enn l’interet sincere pou nou prochain encourage nou pou rod tou l’occasion possible pou partage la bonne nouvelle pendant ki encore ena le temps. (Rom. 10:13, 14) Avek inpé preparation ek kan nou reflechi bien avant, nou tou kapav donne temoignage informel ek kitfois nou pou konn la joie pou faire enn dimoune sincere konn la verité.

[L’encadré page 4]

Sa kapav aide nou si nou ena zis l’objectif pou joinde bann dimoune ek commence bann conversation

[L’encadré page 5]

Beaucoup proclamateur inn trouve bann fason pou crée bann l’occasion pou donne temoignage informel, kan zot inn servi zot l’imagination

[L’encadré page 5]

Bann suggestion

◼ Prié pou gagne l’aide pou ou kapav commence enn conversation

◼ Choisir bann dimoune ki parette amical ek ki pa pressé

◼ Guette dimoune-la, faire enn sourire, ek faire enn ti commentaire lor enn kitsoz ki interesse zot toulé-deux

◼ Ecoute dimoune-la bien

[L’encadré page 6]

Gagne bann bon resultat a travers temoignage informel!

• Pendant ki li ti pé attann dan enn garage ki repare so l’auto, enn frere ti pé donne temoignage avek bann dimoune autour li ek li ti donne zot bann l’invitation l’assemblée pou discours publik. Enn an apré, dan enn l’assemblée, enn frere ki li pa ti koné ti vinn dire li bonjour. Sa frere-la ti enn parmi bann dimoune ki li ti donne enn l’invitation dan sa garage-la, enn an avant! Missié-la inn al ecoute discours publik-la ek li ti donne so nom pou gagne enn l’etude la Bible. Li ek so femme finn prend bapteme.

• Enn soeur ki’nn konn la verité a travers temoignage informel considere bann dimoune ki li joinde grace a so trois zenfant couma so territoire personnel. Parmi bann dimoune ki li considere couma so territoire, ena so bann voisin, bann parent ki li joinde dan lekol ek dan bann reunion pou bann parent. N’importe kan li presente-li, li faire enn ti remark bien simple mais sincere lor couma la Bible enn grand l’aide pou li, pou li kapav eleve so bann zenfant, ek apré li koz lor enn lot sujet. Mais parski li finn deja commence enn conversation, li trouve sa bien plus facile pou koz lor la Bible dan so bann lezot conversation. A travers sa methode-la, li’nn aide 12 dimoune pou prend bapteme.

• Kan enn representant l’assurance ti vinn visite enn soeur, li ti profite l’occasion pou rann temoignage. Li ti demann missié-la si li ti envie gagne enn l’assurance kot li pou gagne enn bon la santé, bonheur ek la vie eternel. Li’nn dire oui ek li’nn demann soeur-la lor ki qualité l’assurance li ti pé kozé. Soeur-la inn montré li bann promesse ki ena dan la Bible ek inn donne li enn publication, ki missié-la inn lire pendant enn soirée. Finn prend bann disposition pou ki missié-la etudié la Bible, li’nn commence assisté bann reunion ek apré li’nn prend bapteme.

• Pendant ki li ti pé voyagé dan enn avion, enn soeur inn commence koz avek enn madame ki ti pé assize a coté li ek li’nn reussi rann temoignage. Kan voyage-la inn fini, soeur-la inn donne sa madame-la so l’adresse ek so numero telephone ek inn encourage madame-la pou demann enn l’etude la Bible prochaine fois ki bann Témoins de Jéhovah vinn visite li. Le lendemain, deux Témoins inn vinn kot madame-la. Madame-la inn commence etudié la Bible, li’nn faire bann progré bien vite, inn prend bapteme, ek li pa finn tardé pou commence etudié la Bible avek trois dimoune.

• Enn frere aveugle ki ena 100 an ek ki reste dan enn home, souvent dire: “Nou bizin le Royaume.” Sa inn amenn bann nurse ek bann lezot patient pou pose bann question, seki finn permette li expliké ki été le Royaume. Enn parmi bann madame ki travail la-bas inn demann frere-la ki li pou faire dan paradis. Li’nn reponn: “Mo pou trouve clair ek mo pou ré-commence marché ek mo pou brule mo fauteuil roulante.” Parski li ti aveugle, li ti demann madame-la pou lire bann periodik pou li. Kan frere-la so tifi ti vinn visite li, madame-la ti demann tifi-la permission pou amenn bann periodik-la kot li. Enn nurse ti dire tifi-la: “Nou nouveau slogan dan home c’est: ‘Nou bizin le Royaume.’”

• Enn soeur ki ti pé faire la queue dan enn restaurant, ti tann enn groupe missié agé ki ti pé assizé pa trop loin ek ki ti pé koz politik. Enn missié ti dire ki gouvernement pa kapav reglé nou bann probleme. Soeur-la ti dire ar li-mem: ‘Sa c’est mo chance.’ Li’nn faire enn ti la priere ek inn aborde-zot. Apré ki li’nn presente-li, li’nn dire zot ki ena enn gouvernement ki kapav reglé bann probleme l’humanité, Royaume Bondié, ek li ti donne zot enn brochure ki li ti ena avek li. Zis dan sa ler-la manager sa restaurant-la ti vini. Soeur-la ti pensé ki li ti pou demann-li allé. Au contraire, li ti dire soeur-la ki li ti pé ecoute li ek li ti pou content gagne enn brochure li aussi. Enn travailleur ki ti pé ecouté li aussi inn aborde soeur-la avek bann larme lor so figure. Li ti etudié la Bible avant ek li ti envie ré-commence so l’etude.

    Piblikasion Kreol Morisien (2000-2025)
    Dekoneksion
    Koneksion
    • Kreol Morisien
    • Partaze
    • Preferans
    • Copyright © 2025 Watch Tower Bible and Tract Society of Pennsylvania
    • Linformasion Legal
    • Prinsip Konfidansialite
    • Reglaz Konfidansialite
    • JW.ORG
    • Koneksion
    Partaze