Donn Zeova Loner par Temwaynaz Okazyonel
1 Bann fidel serviter Zeova rod lokazyon pu donn Li loner tulezur. (Psom 96:2, 3; Ebre 13:15) Enn fason ki nu kapav fer sa se kan nu donn temwaynaz okazyonel. Buku serviter Zeova zordi rekonesan ki enn kikenn finn fer zot konn sa mesaz lor Rwayom Bondye la par enn temwaynaz okazyonel.
2 Suvan kan nu donn temwaynaz okazyonel enn kikenn, sa uver semin pu ki bann lezot usi tann mesaz Rwayom. Par egzanp, konversasyon ki Zezi ti gayne avek enn Samaritenn pre kot lasurs Zakob ti amenn enn kantite dimunn pu interese ar bon nuvel. (Zan 4:6-30, 39-42) Kan Pol ek Silas ti dan prizon dan lavi Filip, zot ti pres avek enn gardyin prizon. Fami sa misye la an antye ti aksepte laverite.—Akt 16:25-34.
3 Bann Lokazyon: Ki bann lokazyon u gayne pu donn temwaynaz okazyonel? Sertin fer li kan zot pe fer shopping, kan zot pe atann kot dokter. Ena lezot ki kapav donn temwaynaz pandan bann brek dan travay uswa dan lekol. Zis si nu met enn piblikasyon dan enn plas kot bann dimunn kapav truv li, sa mem ase pu pus zot pu poz kestyon lor nu bann krwayans.—1 Pyer 3:15.
4 Kuma pu Kumanse?: Dan enn reynion, enn tifi setan ki ti timid-timid, ti tande ki li byin inportan ki nu tu nu prese. Donk, kan li’nn al fer shopping avek so mama, li’nn met de brosir dan so sak. Alor ki so mama ti okipe pu peye lor lakes, tifi la ti ofer enn madam enn brosir. Madam la ti byin kontan ek li finn aksepte. Kan finn demann sa tifi timid-timid la kot li finn gayn kuraz pu koz avek sa madam la, li finn dir: “Mo finn zis dir momem, Ready, Get set, Go! Ek mo finn fer li.”
5 Si nu ule donn temwaynaz okazyonel, nu bizin ena mem latitid ki sa tifi la. Ki kapav ed nu? Nu bizin priye pu nu gayn kuraz pu koze. (1 Tes. 2:2) Prepar tuletan enn kestyon uswa enn size ki kapav interes enn dimunn ek ki u kapav servi pu kumans enn konversasyon. Apre sa gard konfyans ki Zeova pu beni u bann zefor.—Lik 12:11, 12.
6 Kan nu donn temwaynaz okazyonel bann dimunn ki nu zwenn tulezur sa donn Zeova loner ek nu gayn lazwa. Sa kapav usi ed enn dimunn pu vinn lor semin ki amenn ver lavi pu tuletan.