Couma pou presente livre Ki la Bible enseigné?
Sa supplement-la donne nou plusieurs suggestion couma pou presente livre Ki la Bible enseigné vrai-mem? Ki ou bizin faire pou gagne enn pli bon resultat? (1) Presente sa bann suggestion-la dan ou prop mot, (2) adapté zot dapré bann dimoune dan ou territoire, ek (3) familiarise-ou avek bann point precis ki ena dan sa livre-la ek ki ou kapav servi pou commence enn conversation. Ou kapav servi aussi lezot presentation ki adapté ar ou territoire.—Guette Ministère du Royaume janvier 2005, p. 8.
“Harmaguédon”
◼ “Kan dimoune tann mot ‘Harmaguédon,’ beaucoup mazinn enn grand destruction ki pou crase partout. Eski ou pou etonné si ou aprann ki Harmaguédon en fait li enn parmi bann pli bon kitsoz ki kapav arrive nou? [Laisse dimoune-la reponn. Apré sa lire Révélation 16:14, 16.] Remarké seki sa paragraphe-la dire, couma la vie pou été apré Harmaguédon.” Ouvert livre page 82-4, ek lire paragraphe 21.
La Bible
◼ “Dimoune souvent koz la Bible couma Parole Bondié. Eski ou’nn deja demann-ou couma enn livre ki’nn ecrire par bann zom kapav appel Parole Bondié? [Laisse dimoune-la reponn. Apré sa montré li 2 Pierre 1:21, ek ouvert livre page 19-20 ek lire paragraphe 5.] Sa livre-la montré nou seki la Bible dire lor sa bann question-la.” Montré bann question lor page 6.
◼ “Zordi, dimoune kapav gagne beaucoup plus renseignement ki jamais avant. Mais kot-sa ou pensé nou kapav gagne bann bon conseil ki kapav aide nou pou amenn enn la-vie ki heureux? [Laisse dimoune-la reponn. Apré sa lire 2 Timothée 3:16, 17, ek ouvert livre page 22-3 ek lire paragraphe 12.] Sa livre-la explik nou couma nou kapav amenn enn la-vie ki faire Bondié plaisir ek ki bon pou nou.” Montré tableau ek photo lor page 122-3.
La mort/La resurrection
◼ “Beaucoup dimoune demann-zot ki arrivé vrai-mem kan nou mort. Eski ou pensé ki li possible pou nou konn sa? [Laisse dimoune-la reponn. Apré sa lire Ecclésiaste 9:5, ek ouvert livre page 58-9 ek lire paragraphe 5-6.] La Bible promette ki pou ena enn resurrection. Sa livre-la explik nou ki pou arrive bann dimoune mort kan pou ena la resurrection.” Montré zimage ki trouve lor page 75.
◼ “Eski ou pa d’accord ki kan enn kikenn ki nou bien content mort, li normal ki nou envie retrouve li? [Laisse dimoune-la reponn.] Beaucoup finn gagne reconfort dan promesse ki la Bible faire lor la resurrection. [Lire Jean 5:28, 29, ek ouvert livre page 72 ek lire paragraphe 16-17.] Sa chapitre-la reponn aussi sa bann question-la.” Montré bann question ki trouve au commencement lor page 66.
La vie eternel
◼ “La plupart parmi nou, nou ti pou content ena enn bon la-santé ek vive longtemps. Mais, si sa ti possible, eski ou ti pou content vive pou touletan? [Laisse dimoune-la reponn. Apré sa lire Révélation 21:3, 4 ek ouvert livre page 54 ek lire paragraphe 17.] Sa livre-la explik nou couma nou kapav gagne la vie eternel ek couma la vie pou été kan sa promesse-la pou realisé.”
La famille
◼ “Nou tou ti pou content amenn enn la-vie famille ki heureux, pa vrai? [Laisse dimoune-la reponn.] La Bible koz lor enn kitsoz ki tou dimoune dan la famille kapav faire pou ki ena bonheur dan zot famille—montré l’amour pareil couma Bondié.” Lire Éphésiens 5:1, 2, ek ouvert livre page 135 ek lire paragraphe 4.
Logement
◼ “Dan beaucoup pays, li’nn vinn pli difficile pou trouve enn bon lakaz ki nou moyen permette nou payé. Eski ou pensé ki enn jour tou dimoune pou ena enn bon lakaz? [Laisse dimoune-la reponn. Apré lire Isaïe 65:21, 22, ek ouvert livre page 34 ek lire paragraphe 20.] Sa livre-la explik nou couma Bondié pou realise sa promesse-la.”
Jéhovah
◼ “Beaucoup dimoune ki croire en Bondié ti pou content senti-zot pli proche avek Li. Eski ou ti koné ki la Bible en fait encourage nou pou vinn proche ar Li? [Laisse dimoune-la reponn. Apré sa lire Jacques 4:8a, ek ouvert livre page 16 ek lire paragraphe 20.] Sa livre-la finn publié pou aide bann dimoune konn plus lor Bondié, a travers zot prop la-Bible.” Montré bann question ki ena au commencement dan page 8.
◼ “Beaucoup dimoune prié ki nom Bondié, li sanctifié. Eski ou finn deja demann-ou ki sa nom-la sa? [Laisse dimoune-la reponn. Apré sa lire Psaume 83:18, ek ouvert livre page 195 ek lire paragraphe 2-3.] Sa livre-la explik nou seki la Bible enseigné vrai-mem lor Jéhovah ek lor so projet pou bann dimoune.”
Jésus Christ
◼ “Beaucoup dimoune lor la terre finn deja tann koz lor Jésus Christ. Ena dire ki li ti zis enn dimoune extraordinaire. Ena lezot ki adore li couma Bondié Tout-Puissant. Dapré ou, eski seki nou croire lor Jésus Christ, li important?” Laisse dimoune-la reponn. Apré sa lire Jean 17:3, ek ouvert livre page 37-8 ek lire paragraphe 3. Attire l’attention lor bann question ki ena au commencement, zis apré titre sa chapitre-la.
La priere
◼ “Eski ou finn deja demann-ou couma Bondié reponn nou bann la-priere? [Laisse dimoune-la reponn. Apré sa lire 1 Jean 5:14, 15, ek ouvert livre page 170-2 ek lire paragraphe 16-18.] Sa chapitre-la explik aussi kifer nou bizin prié Bondié ek ki nou bizin faire pou ki Bondié ecoute nou bann la-priere.”
La religion
◼ “Beaucoup dimoune pé commence trouve la religion couma enn kitsoz ki crée problem au lieu reglé bann problem. Eski ou pensé ki la religion pé amenn bann dimoune dan bon direction? [Laisse dimoune-la reponn. Apré sa lire Matthieu 7:13, 14, ek ouvert livre page 145-6 ek lire paragraphe 5.] Sa chapitre-la koz lor six kitsoz ki permette nou reconette religion ki Bondié accepté.” Montré la liste ki trouve dan page 147.
Malheur/Souffrance
◼ “Kan enn malheur arrivé, beaucoup dimoune demann-zot si vrai-mem Bondié interessé ar bann dimoune ek si Li trouvé ki zot pé souffert. Eski ou’nn deja pose-ou sa question-la? [Laisse dimoune-la reponn. Apré sa lire 1 Pierre 5:7, ek ouvert livre page 11 ek lire paragraphe 11.] Sa livre-la explik nou couma Bondié pou elimine tou souffrance ki ena lor la terre.” Montré bann question ki ena au commencement page 106.
La guerre/La paix
◼ “Partout, dimoune pé attann kan pou ena la paix lor la terre. Eski ou pensé ki l’espoir pou trouve la paix lor la terre, li zis enn rêve? [Laisse dimoune-la reponn. Apré sa lire Psaume 46:8, 9.] Sa livre-la explik nou couma Bondié pou realise so projet ek couma Li pou amenn la paix dan le monde entier.” Montré zimage lor page 35, ek lire paragraphe 17-21 ki trouve dan page 33-4.
[L’encadré page 5]
Donation
Nou rappel zot ki enn dimoune pa obligé faire enn donation pou li gagne enn publication ou-soit enn periodik. Nou bann publication pa vendé. Bann donation ki dimoune faire c’est pou soutenir nou l’activité mondial. Li bon ki faire lezot koné ki zot kapav faire enn contribution si zot envie, pou soutenir vrai l’adoration. Jéhovah remarké kan enn kikenn faire sa ek Li beni li. (Philippiens 4:18b) Ou kapav dire:
“Mem si nou pa f ixe enn prix lor nou bann publication, nou accepté bann donation ki dimoune faire, dapré zot possibilité, pou nou l’activité mondial.”