Program prochain l’assemblée circonscription
Le monde envie faire nou croire ki sa system-la pou contigne existé pou touletan. Mais c’est pa sa ki Parole Bondié dire nou. (1 Jean 2:15-17) Li aide nou pou comprend ki li pa vaut la peine “ramasse bann tresor lor la terre.” Pou fortifié le peuple Bondié, theme program l’assemblée circonscription pou l’année service 2007 c’est: “Ramasse . . . bann tresor dan le ciel.”—Mat. 6:19, 20.
Kan Éphésiens 2:2 koz lor “pouvoir lor l’air, sa l’esprit ki asterla pé influence bann zenfant ki desobeir Bondié-la,” li pé koz aussi lor l’esprit materialiste. Pareil couma l’air li partout ek li facile pou respiré, “l’esprit sa lé-monde-la” li partout dan sa system-la. (1 Cor. 2:12) Li ena tellement enn grand l’influence ki la Bible dire ki li ena “pouvoir.” Program prochain l’assemblée circonscription pou aide nou pou evite bann pensée materialiste sa lé-monde-la, ek garde nou lizié fixé lor bann kitsoz ki pli important. (Mat. 6:33) En plus, program l’assemblée pou montré nou couma nou kapav compte lor Jéhovah pou ki nou contigne accompli nou ministere malgré bann pression ek bann l’epreuve ki nou kapav gagné.
Faire tou pou assisté toulé-deux jour ek pou “donne enn l’attention special” pendant l’assemblée. (Héb. 2:1) Prend bann ti note lor bann point ki ou kapav applik personnellement dan ou la-vie ek dan ou ministere. Si ou assisté sa program spirituel ki riche-la depuis commencement ziska la fin, ou pou gagne beaucoup l’encouragement ek la force pou contigne “ramasse . . . bann tresor dan le ciel”!