Kan nou disposé pou porte-nou volontaire, sa faire nou gagne benediction
1. Couma eski David ek Nehémia ti montré ki zot ti disposé pou porte-zot volontaire?
1 Kan Goliath ti provok l’armée Israël, n’importe ki soldat ti kapav inn laguerre kont li. Mais c’est enn jeune berger, ki pa ti’nn gagne okenn formation pou laguerre, ki ti porte-li volontaire. (1 Sam. 17:32) Kan bann Juif ki ti sorti en exil ti retourne Jérusalem, zot pa ti arrivé reconstruire bann muraille la ville. C’est enn officier ki ti en charge pou servi le roi Perse di-vin ou-soit lezot la-boisson, ki ti offert so l’aide. Li ti porte-li volontaire pou quitte so grand position dan palais, pou al ziska Jérusalem pou kapav organise travail ki ti ena pou faire. (Neh. 2:5) Jéhovah ti beni David ek Nehémia toulé-deux parski zot ti montré ki zot ti disposé pou porte-zot volontaire.—1 Sam. 17:45, 50; Neh. 6:15, 16.
2. Kifer bann chrétien bizin montré ki zot disposé pou porte-zot volontaire?
2 Zordi, dan le monde pena beaucoup dimoune ki disposé pou porte-zot volontaire. Dan sa bann ‘dernier jour-la,’ la vie bann dimoune bien rempli, ek beaucoup dimoune “content zot-mem.” (2 Tim. 3:1, 2) Li facile pou enn dimoune laisse-li tellement absorbé par so bann l’interet personnel ki li pa prend compte bann l’occasion ki li gagné pou offert so service kan bizin aide lezot. Mais en tant ki chrétien, nou envie imite Jésus ki ti prend l’initiative pou aide lezot. (Jean 5:5-9; 13:12-15; 1 Pierre 2:21) Couma eski nou kapav montré ki nou disposé pou porte-nou volontaire, ek ki benediction nou pou gagné?
3. Kan nou disposé pou porte-nou volontaire, couma sa aidé dan reunion?
3 Pou aide nou bann frere: Nou kapav partage enn “don spirituel” avek lezot kan nou pré pou faire bann commentaire dan reunion kan demann l’assistance pou participé. (Rom 1:11) Kan nou faire commentaire, sa honore Jéhovah, sa faire la verité rente pli bien dan nou l’esprit ek nou leker, ek sa aide nou pou trouve plus plaisir dan reunion. (Ps. 26:12) Nou kapav aussi porte-nou volontaire pou remplacé kan enn dimoune pa kapav faire so devoir dan Lekol ministere theocratik. Sa pou aide nou pou ameliore nou capacité pou enseigné.
4. Cite lezot fason pou montré ki nou disposé pou porte-nou volontaire.
4 Bann frere kapav montré ki zot disposé pou porte-zot volontaire kan zot ena desir pou prend bann responsabilité dan congregation. (Is. 32:2; 1 Tim 3:1) Nou tou kapav aidé pou ki bann l’assemblée deroule bien kan nou porte-nou volontaire pou travail dan bann different service ki ena. Kan nou porte-nou volontaire pou participe dan predication avek surveillant circonscription ou-soit kan nou invite li pou enn repas, sa faire ki ena enn “l’echange l’encouragement.” (Rom 1:12) Kan nou propose pou aide bann orphelin, bann veuve, bann ki malade ou-soit ki ena enn handicap physik, bann mama ki ena bann ti-zenfant, ek lezot dan congregation lor plan pratik, nou gagne la joie ek faveur Jéhovah.—Prov. 19:17; Actes 20:35.
5. En rapport avek la Salle du Royaume, dan ki domaine bizin bann volontaire?
5 Enn lot fason pou offert nou lé-temps ek nou zeffort, c’est kan nou aidé pou nettoyage ek entretien la Salle du Royaume. En plus, a cause beaucoup dimoune pé vinn dan la verité, pli allé pli bizin bann nouveau la-salle ek bann volontaire pou construire sa bann la-salle-la. Enn couple ti porte-zot volontaire pou aide Comité de construction regional dan zot pays, mem si sa couple-la pa ti konn nanyin dan construction. Finalement, zot finn gagne enn formation ek asterla zot kapav aidé pou pose blok. Madame-la dire: “Kan nou’nn travail ensam avek lezot, sa finn crée bann l’amitié bien solid. Kan arrive la fin la journée, nou fatigué physiquement mais nou senti ki nou’nn gagne la force spirituellement.”
6. Kifer predication sa-mem travail volontaire pli important ki nou kapav faire?
6 Dan predication: Predication Royaume Bondié sa-mem travail volontaire pli important ki nou kapav faire zordi. Kan nou aide bann dimoune pou comprend ek pou mette en pratik bann conseil ki ena dan la Bible, zot gagne enn but dan zot la-vie ek aussi la force pou debarrasse bann mauvais l’habitude. Grace a la Bible zot aprann enn l’espoir pou l’avenir ki fortifié zot. Kan nou donne zot enn l’enseignement biblik, nou faire enn travail volontaire ki donne nou la joie ek ki faire lezot gagne bann bienfait ki dure bien longtemps. (Jean 17:3; 1 Tim. 4:16) Kitfois nou situation kapav permette nou faire pionnier auxiliaire ou-soit pionnier permanent, al reste dan enn l’endroit kot bizin plus proclamateur, ou-soit aprann enn lot langue, pou faire plus dan sa travail-la.
7. Kifer zordi li encore pli important ki nou porte-nou volontaire?
7 Le roi David ti annoncé ki peuple Bondié ti pou “porte-zot volontaire” dan lepok kot Messie ti pou commence regné. (Ps. 110:3, note) Ena beaucoup travail pou faire parski Jéhovah pé accelere dernier recolte spirituel. Alors nou kapav porte-nou volontaire. (Is. 60:22) Eski ou’nn dire: “Ala mo la! Envoye moi”? (Is. 6:8) Oui, kan nou montré ki nou disposé pou porte-nou volontaire, nou faire plaisir Jéhovah ek nou gagne bann grand benediction.