Imite Christ dan ou ministere
1 Jésus inn laisse nou enn l’exemple pou nou suive dan nou ministere. Li ti montré so l’amour profond pou Bondié ek pou bann dimoune dan beaucoup l’occasion ek dan beaucoup fason. Li ti enseigne bann dimoune ki ti ena l’humilité, la verité ek li ti faire bann action ki ti montré so l’amour fidel pou bann ki ti pé souffert ek ki ti accablé.—Mat. 9:35.
2 L’exemple Jésus ek so bann l’enseignement: Jésus pa ti laisse-li distraire; li pa ti mele-li dan bann zaffaire politik ni bann travail social pou ameliore la vie bann dimoune. Ni li ti laisse okenn lot objectif, mem si sa ti parette bon, distraire li ou-soit passe avant so travail principal. (Luc 8:1) Li ti concentré lor predication la bonne nouvelle lor Royaume Bondié ki sel solution permanent pou bann problem l’humanité. Jésus ti ena enn grand travail pou faire ek li ti ena enn lé-temps limité pou faire sa. Kan bann dimoune dan Capernaüm ti envie ki li reste dan zot la-ville, Jésus ti dire so bann disciple: “Anou al enn lot place . . . pou ki mo kapav preché la-bas aussi, parski c’est pou sa raison-la ki mo finn sorti.”—Marc 1:38.
3 Apré ki li ti donne so bann disciple enn formation, Jésus ti envoye zot ek ti donne zot sa bann instruction precis-la: “Preché ek dire: ‘Royaume ki dan le ciel finn approché.’” (Mat. 10:7) Li ti montré so bann disciple ki bann l’interet Royaume Bondié bizin passe en premier dan zot la-vie. (Mat. 6:33) Bann dernier parole ki li ti dire avant li monte dan le ciel, ti montré bien clair seki zot ti bizin faire. Li ti dire: “Alors, allé ek faire bann disciple parmi bann dimoune dan tou bann nation.”—Mat. 28:19.
4 L’importance Royaume Bondié: Royaume Bondié, sa-mem ti principal sujet conversation Jésus ek li ti encourage so bann disciple pou suive so l’exemple. Malgré bann zeffort ki zot faire, bann dimoune pa kapav reglé zot bann problem. (Jér. 10:23) Zis Royaume Bondié ki pou sanctifié nom Bondié ek pou amenn enn soulagement permanent pou bann dimoune. (Mat. 6:9, 10) Bann dimoune “pé plaigné a cause bann kitsoz detestable ki pé faire” dan le monde. Kan nou enseigne zot bann verité lor Royaume Bondié, sa aide zot pou reussi dan zot la-vie ek pou vive heureux asterla, ek reste attaché ar enn l’esperance sur pou l’avenir.—Ézék. 9:4.
5 Jésus pé contigne joué enn role dan travail predication la bonne nouvelle lor Royaume Bondié ek li donne nou l’assurance ki li pou soutenir nou. (Mat. 28:20) Ziska ki point nou pé suive model ki Jésus inn laissé pou nou dan nou ministere? (1 Pierre 2:21) Dan sa bann dernier jour ki bien important-la, anou faire tou seki nou kapav pou suive bien l’exemple ki Jésus inn laissé pou nou dan ministere!